MPL Relegation a hot: Project Vengin goal an surtir; ICU-ah Electric Veng leh Venghnuai an dah

13th December, 2023

Zote Toyota MPL10-ah nimin khan Project Veng FC-in semifinal lut tawh Mizoram Police chu 5-1 in an sawp. Kolasib club hi table-ah paruknaah awmin an him rih a, vawiina Electric Veng FC leh FC Venghnuai inkhelh zawhah team dinhmun a chiang ang.

Table mawngphaha awm mek FC Venghnuai hian vawiin tlai dar 4:00-ah Aizawl FC an hmachhawn dawn a, Venghnuai hian him tura chak an mamawh ang chiahin I League club tan semifinal khel turin chak a ngai. Zanin dar 8:00-ah Chawnpui leh Electric Veng te an inkhel bawk ang.

Project Veng an vul

Kolasib club Project Vengin MPL khel chhunzawm turin chak an mamawh a, an ṭhat dan berin player an luhtir. Police erawh semifinal khel turin an him tawh a, player an thlak hlawk. Lalrinzuala Khiangte chauh chu rinrawla ngaih theih a ni.

Project Vengin ṭan phat aṭangin nung takin bul an ṭan a, an khawih apianga rangkachakah a chang ta emaw tih tur khawpin an 'puja' a fuh. Midfielder thawkrim Jessie Lalmawizuala'n goal hmahruai a khung a, Jack Lianlalmawi Neihsial-a'n a khung belh. Project Vengin an nawr na a, an phu hrim hrim.

Jehova Lalthangsanga'n goal mawi bik a khung a, box chhung dinglam aṭangin a hlai lut nalh hle. Police an talbuai a, Ronald Zothanzama'n an lamah a tauh lut. Project Veng an che ṭha tluang a, Lalfamkima'n mawi zetin a tauh goal leh bawk.

First half-ah 5-0 a ni a, Police-in player ṭha an luhtir a, an inkhel tawk. Malsawmfela a hmuhnawm a, goal hmaah a vannei tawk lo. A tawpah erawh Police-in goal an khung a, Lalramthara'n a tauh goal. Police an la mualpho tho a, Project Veng an vul.

Engtin zel?

MPL10 handbook-ah away goal rule dah tel leh a ni a, hei hian Venghnuai beiseina a siam. Venghnuai hian Aizawl FC an hneh theih chuan Project Veng nen 12 point ve ve an hmu ang a, away goal rule-a ṭha zawk chu Venghnuai an ni.

Venghnuai hian Project Veng hi an la lehthal thei a, mahse Aizawl FC hneh a har dawn. Electric Veng hian hnehna an chan chuan an him mai dawn a, mah se Chawnpui hneh hi a awlsam lo ang.

Venghnuai, Project Veng leh Electric Veng hi point 12 vek an hmuh theih dan a awm a, an point hmuh a inang vek a nih chuan goal difference en tur a ni. Goal difference en tur a nih chuan Project Veng dinhmun a ṭha.