African zinga thiam ber Victor Osimhen

Nigeria leh Napoli striker ni bawk Victor Osimhen chu 2023 African Footballer of the Year atan thlan a ni. Chawimawina hi Confederation of African Football (CAF) buatsaih niin Thawhṭanni zan khan Marrakesh-ah an sem.

Osimhen hian chawi-mawina dawng tur hian Egypt thiampuipa Mohamed Salah leh Morocco international Achraf Hakimi te a khum. Nwankwo Kanu (1999) hnuah Nigerian player ten award an dawn leh hmasak berna a ni bawk.

Nigeria ram tan hun duhawm bik a ni - Osimhen bakah hian Barcelona star Asisat Oshoala-i chuan hmeichhe lama Player of the Year chawimawina a dawng ve bawk. Award hi kum 2014, 2016, 2017, 2019 leh 2022 te khan a lo dawng tawh bawk a ni.

Award hi CAF hnuaia technical committee te bakah African chanchinbumi te, coach leh captain ten an thlan a ni. Mimal chawimawina hrang hrang bakah hian team chawimawina pawh siam a ni bawk.

Osimhen chu

A vawi khat nan Player of the Year a ni a, football ngainatute tan chuan tunge Osimhen hi a nih inzawh nawn a ngai tawh lo. Season hmasa khan Napoli tan Serie A match 32 aṭangin goal 26 khungin sulhnu ropui a hnutchhiah.

Naples club hi kum 33 hnua a vawi khat nan Scudetto a lakpui a, kumin May thla khan an champion theihna tura inkhel pawimawhah goal a khung a ni. Tun thlatir lam khan Italian Footballers' Association Player of the Year atan thlan a lo ni tawh bawk.

Club tan chauh ni loin Nigeria tan pawh a khel ṭha. Africa Cup of Nations (Afcon) lamah pawh match li a khelh aṭangin goal nga a khung a, kum tharah AFCON Finals khel turin an tling, champion tur erawh chuan hmabak an la nei.

Ram pakhat leh khaw-mualpui pakhat chawimawina chauh a ni lo a, khawvel huap chawimawina Ballon d'Or sem takah pawh khan a sang zual 10 zingah tel phakin pariatna dinhmun a luah hial, season hmasa lama a sulhnu enin a mak hran lo.

Chawimawina dang

Qatar World Cup-ah khan Morocco chuan khawvel an barakhaih a, thil mak thlentirtu Walid Regragui-a chu Coach of the Year atan thlan niin, a team chu National Men's Team of the Year atan thlan an ni bawk.

Ennawm ropui berah khan Morocco hian semifinal an thleng, African team zingah World Cup bikah chuan a thiam zual pariat zinga tel thei hmasa ber an ni, an si ban nghaktu Yassine Bounou chu Men's Goalkeeper of the Year hlan a ni.

Egyptian club ṭha Al Ahly chuan Men's Club of the Year award an dawng, anni hian a vawi 11 nan Champions League title a la. South Africa international player, Al Ahly tana player pawimawh Percy Tau chu Interclub Player of the Year a ni bawk.

Award semna hunah hian mipa leh hmeichhe team thlan chhuah an ni bawk a, mipa team huangah Manchester United goalkeeper Andre Onana, Sofyan Amrabat, Thomas Partey leh Mohamed Salah te chu Premier League aṭanga lang an ni.