Ka theihna min cho chhuak - Djokovic

Novak Djokovic chu season thar hmang turin a inpeih leh tawh. Serbian star chuan tunlai rawlthar chhuak ṭha tak takte chuan amaha theihna awm chu an cho chhuak tih a sawi - kum tharah pawh a la hlauhawm dawn.

Djokovic hi season tharah chuan kum 37 mi a ni tawh dawn, tun season hman zawh takah khan Grand Slam pali zinga pathum - Australian Open, French Open leh US Open te a la thei, a sulhnu hi a vanglai ang maia ropui a la ni reng.

Grand Slam vawi 24 champion tawh Djokovic chuan, "Player naupang leh chhuak tharte hi hlawhtlinna chan châkin an tuihal huam huam a ni ber a, anni hian chakna min pe. Hlawhtlinna dang chan belh zel duhna rilru min siamsak a ni, ka hmuhdan chuan keimaha a ṭha ber min phawrhsak," a ti.

Player chhuak thar zingah Carlos Alcaraz chu Djokovic elphak ber a ni rih a, Spanish star hian Wimbledon title inchuhna inkhelah a hneh. Ani bakah hian Jannik Sinner chuan Davis Cup-ah Novak hi a hneh bawk, anni pahnih hi kum tharah pawh a tan an hnawk ang.

Alcaraz chungchang sawiin Djokovic chuan, "A kum zat ngaihtuah chuan a puitling ka ti hle a, player ṭhain a neih tur ang hi chu a nei kim hleah ka ngai. Mi ṭha an rawn chhuak zel a, chuvangin kei pawh tun hma zawng aia ka ṭan a ngai dawn," a ti.

Djokovic hian world number 1 ni chungin season tawp a hmang a, kum thar pawh a chung bera awm chungin bul a ṭan dawn. Grand Slam champion hnem lama amah hnaih bertu Rafael Nadal (22 titles) a lo kir leh dawn, tennis boruak a nung lehzual ngeiin a rinawm.

Nakkum January thlaa khelh tur Australian Open-ah Djokovic hi champion lai ni chungin a inlan ang.