Club World Cup khelh beisei Haaland

Manchester City striker Erling Haaland chu kephah hliam vangin a chawl mek a, a lo kir hun tur tak sawi theih ni chiah lo mah se December 19-a Club World Cup an khelh hunah chuan a inlan theih beisei a ni.

Premier League champion hian Pathianni zan khan Premier League inkhelah Luton Town chu 2-1 in an hneh a, tun hnaia an result ṭha hleithei lo chu an siamṭha a, manager Pep Guardiola chuan an chak hnuah an tunlai boruak chu an tan chona a nih thu a sawi.

Haaland chungchang sawiin Guardiola chuan, "Kan beisei dan chuan Club World Cup a khel hman ang. Ni tin, chawlhkar tin hian a dinhmun kan endik zel. Erling hi kan tana mi pawimawh a ni a, a ni chhunzawm bawk ang.

"Chutihrualin hliam tawk thei a ni ve tho a, hremna a tawk theiin player dang ang bawkin harsatna dang pawh a tawk thei, chuvangin a tel loa khelh dan pawh kan thiam tel a ngai ve bawk," tiin a sawi.

Club World Cup hi Saudi Arabia-ah khelh tur niin, European champion Manchester City hi semifinal aṭangin an inlan ṭan ang. Mexican club Leon leh Japanese club Urawa Red Diamonds te inkhela chak zawk an hmachhawn ang.

Pep Guardiola naute hian Club World Cup hmain Champions League leh Premier League khelh hmabak an la nei. Zanin dar 11:15 hian UCL group match khel turin Red Star Belgrade an tlawh dawn.

European football inelna sang berah hian last 16 an luh chian tawh bakah Group G hmahruaitu an nih chian tawh avangin player ṭha an inkhek thei dawn a ni.