Sreenidi-in Mohammedan an hnaih

I League-ah Sreenidi Deccan chuan Thawhṭanni khan Delhi FC chu an mualah 1-0 in an hneh a, hmahruaitu Mohammedan SC nen point 20 ve ve an hmu. Deccan Arena-ah hian goal awmchhun hi Delhi FC defender Bali Gagandeep-a'n an lama a tihluh a ni.

Sreenidi hian point 20 hmuin pahnihnaah invawrh chho mah se Aizawl FC aiin match khatin an khel tam a, Mohammedan aiin match hnihin an khel tam bawk. Mizo club hian match kuaah point 17 an hmu a; December 16, Inrinnia Gokulam Kerala an mikhual hunah hnehna an chan chuan pahnihnaah an invawrh chho leh thei ang.