Mizoram tana Ranji Trophy khel tur thlang

India ram cricket thuneitu sang ber Board of Control for Cricket in India (BCCI) hnuaia state hrang hrang inelna - Ranji Trophy 2023-2024 tan Cricket Association of Mizoram (CAM) hnuaia Men’s Selection Committee chuan Mizoram aiawh tur player a thlang fel.

Ranji Trophy atan hian tualchhung player 12 bakah, state pawn player pathum ziahluh an ni a, koh leh mai theih (standby) atan player paruk dah an ni bawk a, squad-ah hliam leh harsatna dang thleng a awm chuan inthlak kual leh thei reng an la ni.

Mizoram team aiawh turin Ramhlun Venglai chuan player pathum - Joseph Lalthankhuma, Remruatdika Ralte leh Vanlalhruaitluanga te an thawh a, tualchhung inelna lama an chetṭhat ṭhin ang ngeiin state aiawh tur an ngah hi a mak lo.

Mizoram hi Sikkim, Nagaland, Arunachal Pradesh, Meghalaya leh Hyderabad te nen group pakhatah an awm khawm. An match hmasa ber atan nakkum January 12 hian Gokulbhai Somabhai Patel Stadium, Nadiad-ah Sikkim nen an inkhel ang.