IPL Player Auction tur 333; Mizo an tel lo

Indian Premier League (IPL) 2024-a player lilam tur chu December 11, Thawhṭanni khan puan a ni a, player 333 phochhuah a ni. Player lilamna hi Coca-Cola Arena-ah December 19, Thawhlehni tlai dar 2:30 aṭangin neih a ni dawn.

Mizo an tel lo

Lilam tura chhawpchhuah player 333 zinga 214 hi Indian an ni a, 119 hi ram pawn player an ni. Indian 214 zingah hian Mizo an awm lo a, chutihrualin Mizoram aiawha khel player erawh an awm. Bangalore tlangval K.C Cariappa chu a tel a, Cariappa hi spinner niin Kolkata Knight Riders leh Rajasthan Royals tan a khel tawh thung.

Ram pawn player-ah hian associate member ram aṭangin pahnih an awm. Cricket thuneitu sang ber ICC hnuaiah hian full member 12 leh associate member 96 an awm mek.

Full member chu cricket-a sulhnu nei ṭha tawhte an ni hlawm a, chungte chu Afghanistan, Australia, Bangladesh, England, India, Ireland, New Zealand, Pakistan, South Africa, Sri Lanka, West Indies leh Zimbabwe te an ni. Associate member Netherlands leh Namibia ten player pakhat ve ve an thawh.

Beisei a awm?

BCCI apex council member Mamon Majumdar chuan, "Mizo tan beisei tur chu a awm a, mah se hun a la duh deuh dawn. Syed Mushtaq Ali Trophy, Vijay Hazare Trophy leh Ranji Trophy-ah te hian chet ṭhat a pawimawh. Kum thum te a vei leh a, player an ṭan bawk chuan auction list-ah hian kan tel thei ang," tiin Vanglaini a hrilh.

Mamon hian CAM honorary secretary hna hun rei tak a chelh tawh a, BBCI leh CAM-ah nihna a chelh kawp theih loh avangin CAM aṭangin a inhnukdawk. Mizoram dinhmun sawi chhunzawmin Mamon-a chuan, "Net bowler-ah Mizo kan tel tawh a, chuvangin IPL khel thei tur chu kan ni alawm. Player beiseiawm tak tak kan nei a, mah se inti 'star' mai lo a, an thawhrim a ngai," tiin Mizo tan kawng a inhawn thu a sawi.

IPL-a player lilamnaa tel pha chin hi chuan a tlem berah nuai 20 an hlawh a, club lam chhan huai dan a zirin nuai 100 chuangah te a kai chho thei. Season liam ta khan wicket keeper Ishan Kishan man chu nuai 150 aṭangin a inṭan a, nuai 1525-in Mumbai Indians-in an lei daih a ni.

IPL Kalphung chu

IPL-ah hian team 10 an awm mek a, team tin hian player 25 an nei thei a, ram pawn player pariat an la thei. Season khatah IPL club pakhat hian crore 100 (nuai 10,000) an hmang thei a, club hian an duh ang player-te an chelh tawh.

Player 250 ziahluh theih aṭangin hmun ruak 77 chauh a awm a, heng zinga 30 hi ram pawn player tana zuah a ni. Player 333 hian hmun ruak 77 hi an inchuh dawn a, lilam tura hming lang zingah 256 an tel dawn lo.

IPL hi kum 2008 aṭanga ṭan kha a ni a, cricket khawvel thlak danglamtu niin cricket inelnaa sum tamna ber a ni a. Khawvela cricket player ṭha zawng zawng tel châkna a ni.