Turkey-ah referee an hnek!

Turkish Football Federation chuan Turkish Super Lig-ah referee kut thlakna a thlen avangin an ram football-a league hrang hrangte chu an titawp lailawk a, "League zawng zawnga match khelh turte chu tiam chin awm loa chawlh rih tur a ni," an ti a, an khelh leh hun tur a la sawi theih loh.

Thawhṭanni zan khan MKE Ankaragucu leh Caykur Rizespor te chu league-ah an inhmachhawn a, hun pek belh minute sarihnaah 1-0 a hmahruai rengtu Ankaragucu chuan goal an chhuah a, 1-1 a nih phah.

Inkhela thil thlen danah Ankaragucu president Faruk Koca a lungawi lo a, khelmualah tlan lutin referee Halil Umut Meler chu a hnek - Meler hi khelmualah tluin, kut thlak zui a ni bawk.

TFF chairman Mehmet Buyukeksi chuan, "Turkish football tan thil zahthlak tawpkhawk a ni," tiin thil thleng chu na takin a dem a, Koca hi damdawi in lamah enkawl zui niin, hlauhthawnawm a nih loh thu sawi a ni.

Kum 37 mi Meler hi Turkey-in referee an neih ṭhat ber pawl a ni a, UEFA elite referee list zinga tel phak niin, FIFA hnuaia international game engemawzat a lo enkawl tawh bawk.

Turkey president Recep Tayyip Erdogan chuan, "Referee Halil Umut Meler chunga kutthlakna thleng hi ka dem takzet a, a dam leh thuai theihna turin duhsakna ka hlan a ni," a ti.

MKE Ankaragucu pawhin an President chet dan chu pawi an tih thu sawiin, "Caykur Rizespor nena kan inkhelh zawha thil thleng avangin Turkish football leh infiamna dang chungah ngaihdam kan dil a ni.

"Referee zawng zawng chungah ngaihdam kan dil a, a bik takin kutthlak tuartu, referee Halil Umut Meler chu a dam leh thuai theih nan duhsakna kan hlan a ni," a ti.

TFF chairman Buyukeksi chuan, "Football hi indona mual a ni lo a, a tawpah thihna a awm tur a ni lo. Team zawng zawng a rualin a champion theih loh a, chu chu kan hre tur a ni. Hei hi kan vai mawhphurhna a ni, tih i hria ang u," a ti a, a lawm lo hle.

Buyukeksi chuan sawi zawmin, "Ankaragucu leh an manager te chu na taka hrem an ni ang," a ti a, TFF pawhin thuchhuah siamin, "President, manager, coach leh TV commentator ten referee ringawt an bitum ṭhin avangin, zanin thil thleng duhawm lo tan hian kawng an lo sial lawk a ni.

"Sorkar nena thawk dun chungin, he thil thlenga inhnamhnawih zawng zawngten hremna na tak an tawrh theih nan hmalak a ni ang. Buaina siamtu club, President, manager leh Meler kutthlaktu zawng zawngte chu a na thei ang berin hrem an ni ang," a ti.

Turkey-a referee intelkhawm pawl Association of Active Football Referees and Observers of Turkey chuan, "Meler chunga kutthlakna hi referee Halil Umut chunga thleng chauh a ni lo a, referee chhungkua min beihna a ni," an ti a, referee te chu inkhel enkawl rih lo turin an ti bawk.

Turkish Super Lig Professional Football Clubs Foundation pawhin thil thleng chu na taka demin, "Hetiang ang thil hi a thlen tawh lohna turin club chuan engpawh tih a huam a ni," an ti a, an lungawi lo hle.