Odisha-in AFC Cup knockout round lut

Indian Super League club Odisha FC chuan Thawhṭanni zan khan AFC Cup-ah 1-0 in Bashundara Kings an hneh a, inter-zone playoff semifinal an lut - Mourtada Fall chuan inkhela goal awmchhun hi a khung.

Odisha tan defender Jerry Lalrinzuala, K. Lalṭhathanga (Puitea) leh Jerry Mawihmingthanga te chuan inkhel bul an ṭan a, Asian football-a club inelna sang ber dawttuah an team chu knockout round an hruai thleng.

Group D-ah Odisha hian Bangladesh club ṭha Bashundhara Kings, Maldives club Maziya S&RC leh Mohun Bagan te an awmpui a, match ruk an khelhah vawi li chak chungin knockout round hi an lut - an group aṭang hian hmahruaitu team chiah hian knockout round hi an lut a ni.

Odisha hian inter-zone playoff semifinal-ah hian hnehna an chan chuan, inter-zone playoff final an lut ang a, hei hi knockout tournament pangngaia semifinal ang kha a ni - hetah hian an chak leh chuan final an lut ang.