Liverpool chhandam nan VAR

Tun season-a Liverpool hmelma lian bera chhal ngam chu video assistant referee (VAR) leh inhliam a ni a, Pathianni zanah erawh VAR hi Liverpool lamah a ṭang thung. 

Fulham laka penalty chawi ngei tura ngaih Liverpool-in an chawi lo a, minute 79-naa Mohamed Salah penalty hmangin Premier League club tenau Fulham chu 1-1 in an inhnehtawkpui hram. 

Premier League hmahruaitu Totten-ham Hotspur-in khualmualah Crystal Palace chu 1-1 in an inhnehtawkpui a, Reds-in Spurs chak zawh loh thu hre sain Fulham an lenchilh - mahse, Jurgen Klopp-a nauten thawnthu dang an ziak thei bik lo a, point khata an lungawi a ṭul.

Hetihlai hian Arsenal fan-ten chanchin lawmawm an hre thei lo a, Krismas hnaihah meuh pawh, "Hlim takin i chawimawi ang u," tih lam an hawi thei ve rih lo - Burnley lakah 1-0 in an tlawm. 

Fulham khelmualah Liverpool-in beisei an phak lo a, inkhel ṭantir aṭangin league table mawng lama awm Fulham-in Liverpool an ngam - hliam vanga a chawlh reng hnua lo kir Alisson awm lo se Jurgen Klopp-a naute hi goal tam zawk chhuah thei an ni. 

Alisson hian Cot-tagers (Fulham sawina) tana khel ṭha em em mai Ivan Cavaleiro-a goal khung tur nia lang chu vawi hnih ṭha zetin a dansak a, Cavaleiro laka foul Fabinho-a'n penalty-a chawi lo chu a vannei takzet. 

Referee Andre Marriner-in Fabinho foul hi a ham lo zet a, mahse, video assistant referee lamin ennawn turin thurawn a pe - Marriner hian screen-ah a ennawn a, Brazilian centre back hian chiang takin Cavaleiro-a tlawh fuh. 

Mahse, rin loh takin Marriner hian penalty pekna turah a ngai lo - Fulham an hnual rei phah lo. Minute 25-naah Bobby Decordova-Reid chuan Reds tlarhnung tihsual zar zoin hmahruaina goal a khung ta tho. 

Premier League champion-in ball an chang tam a, minute 79-naah Reds vanneihna a her chhuak -Aboubakar Kamara chuan Georginio Wijnaldum-a freekick chu a kuta dangin penalty a chawi. 

Liverpool tan Salah chuan harsatna nei loin goal-ah a chantir a, goal dang erawh an hlawh chhuak thei tawh lo - Fulham-in a tawp thlenga Reds an nawr ngam kha 'huaisen' tih loh rual an ni lo a, chutihrual chuan Liverpool-in an vanduaina an thlir duh a nih erawh chuan sawi tur a awm ve tho. 

Player hliam ngah vanga talbuai sa team hian tun hnaia form tak Diogo Jota chu hliam vangin an chhawr thei lo a, Portuguese forward hi kar ruk vel tal a chawlh a ngai dawn - Joel Matip chu second half-ah hliam vangin a inlan thei lo zui a, Jordan Henderson-a shot Fulham keeper  Alphonse Areola-a'n a dante kha pui tak a ni. 

Liverpool boss Jurgen Klopp chuan, "Inkhel ṭantir lam minute 30 kha chu kan che hleithei lo a, khatihlai kha chuan tlawm thei dinhmunah kan ding hial a ni. Second half-ah kan zia a, goal tam zawk khung thei kan ni - Champions League match khel chau ho chu kan talbuai vek a, a harsa ve bawk a ni," 

tiin a sawi.