Europe inelna aṭangin Man United an tla

Manchester United-in an mual Old Trafford-ah Bayern Munich 1-0 in an hneh lo a, Champions League aṭanga an tlak bakah Europa League khel tur pawhin an tling zo lo. December thla laihawlah Erik Ten Hag-a leh a hote Europe zinkawng chu a tawp.

December 12, Thawhlehni zan inkhelah Bayern tan Kingsley Coman-a'n goal awmchhun a khung a, group A aṭangin Bavarians bakah Galatasary hnehtu Copenhagen an tling ve bawk. Man United hi chak ta reng pawh ni se UCL aṭangin an tla dawn tho a, amaherawhchu group match vawi ruk awma vawi khat chauh chak leh vawi li ngawt chak loh hi mualphona a ni.

An indah ṭha lo

Erik ten Hag-a'n inkhel pawimawhna a hrechiang a, an ṭhat dan ber tura a ngaih angin player a remah a ngaih theih. Man United hi tla thei dinhmunah an ding a, kartawpah Bournemouth 3-0 ngawta an hneh loh avangin team boruak ṭhat nan result ṭha an mamawh.

Bayern hi match nga khelh aṭangin point 13 hmu tawh mah se an indahṭha chuang lo. Kartawpah Bavarians hian Eintracht Frankfurt 5-1 in an hneh lo a, Thomas Tuchel-a'n a hna chelh chhunzawm nan Man United hneh a pawimawh tih a hria. Harry Kane bakah player ṭha dang an inlan vek.

Goal khat chauh

Old Trafford-ah inkhel nung ṭha tak phochhuah a ni a, goal chance awm bawk mah se chance ṭha bik a tam lo. Leroy Sane-a'n Kingsley Coman-a ball vawrhluh goal zawna a pet fuh lo chu a uiawm bera ngaih a ni. English club hian Copenhagen-a inkhel result an ngaihven pah a, Danish club leh Galatasaray inkhelah pawh hun chanve hmalamah goal a lut lo.

Second half-ah Bruno Fernandes-a'n box pawn aṭangin ṭum hnih goal khung theihna tur nei mah se goal zawnah a pet lo ve ve. Antony a ṭha teuh a, a hmawr a bawk thei ṭhin lo. Bayern erawhin Harry Kane an nei a, England captain hian goal khung lo mah se a ball pek fing deuh chu minute 71-naah Coman-a'n a khung.

Hemi hma deuh hian Copenhagen-in Galatasaray lamah Lukas Lerager hmangin minute 58-naah goal an khung a, Man United-in goal an chhuah leh zui avangin Europe-a an beiseina chu a tawp. Copenhagen-in Bayern hnung an zui a, Galatasaray-in Europa League an khel zui ang a, Man United erawh a tawp berah an awm. Chutihrualin Istanbul-a Man United-in point thum an hlawhchhuah loh khan Champions League last 16 beiseina hi chu a tawp titih tawh hrim hrim.

Engtin zel?

Man United-in UCL an khelh chhiat ber ṭum a ni a, vawi khat chauh an chak a ni ringawt lo - goal 15 tehmeuh an chhuah. Copenhagen leh Galatasaray te nen group khata an awm chunga hetiang result an nei hi mualphona a tling.

Bayern an hmachhawn ṭumah pawh hun tawp hmain fan sang chuangin Old Trafford an chhahsan a, dem theih an ni lo - an club hmangaih chungah beiseina an nei tawh lo.

Man United-in an duh ang result an hlawh chhuak lo a, Ten Hag erawhin player-te a la chhan. Dutch manager chuan, "Goal venhim leh pressure pek kawngah kan tiṭha. A hmawr kan bawk fuh loh avangin kan khelh ṭhatna kan hmang ṭangkai lo. Bayern erawhin danglamna thlen thei player an kawl," tiin a sawi.

Hmasawn an mamawh thu sawi zuiin Ten Hag chuan, "Tun aiin kan khelh dan a ngelnghet a ṭul. Manager ka nih angin team siam ṭhat hi ka hna a ni a, player-te pawhin mawhphurhna an lak a ngai. Manager leh player thawhhona a ṭhat a ngai a ni," tiin a sawi.

Manchester United-in December 17, Pathianni zan dar 10:00-ah Liverpool an hmachhawn dawn a, an inkhelhna tur hi Anfield a nih bawk avangin Ten Hag-a hote tan hmabak a harsa khawp ang.