Chiellini-a'n inkhelh a chawlhsan

Italy legend Giorgio Chiellini chuan football a chawlhsan thu a puang a, a inkhelhna chungchang chu a zinkawnga thawnthu ngaihnawm leh hlu ber a nih thu a sawi zui bawk - kum 39 mi a nih tawh avangin a chawlh a hun ve tawh a ni.

Chiellini hi khawvel defender ṭha bikte zinga mi a ni a, club lama hlawhtlinna hrang hrang a chan bakah Euro 2020 khan captain ni chungin Azzurri chu a champion pui a, inelna thlengtu leh team ṭha ni bawk England an hneh.

A vanglai chuan Juventus tan tlarhnunga ban rinawm a ni ṭhin, kum 2011 aṭanga 2020 chhung khan Old Lady chu a zawnin Italian champion a nih pui a, heng hunlai tho hian Coppa Italia nomawi chu vawi nga an chawi bawk.

Turin khawpui aṭangin kum 2022 June thla khan Major League Soccer (MLS) club Los Angeles FC a zawm a, kar hmasa khan MLS Cup-ah Columbus Crew nen an inkhel, a tana match hnuhnung ber a ni ta a ni.

Livorno aṭanga football zinkawng zawh ṭantu Chiellini chuan, "Ka tan chuan football hi engkim a ni a, ka damchhunga ka hriatreng tawh tur leh thil ropui ka tawn theihna chhan a ni, ka tan chuan an hlu takzet.

"Mahse, tunah chuan chu thawnthu bu ngaihnawm tak chu khup a lo hun ve ta a, ka hringnuna zinkawng dang zawh ṭan hun a lo ni ve ta, chona hran ka hmachhawn ve tawh dawn a ni," tiin kum 23 a chamchilh tawh professional football a mangṭha.

Italian defender hian Juventus tan season 17 a hman chhungin inelna hrang hrangah match 561 a khelhsak a, goal 36 khungin nomawi ṭhahnem tak a chawipui. Juve bakah hian loan hmangin Fiorentina tan season khat chu a khel ve bawk.

Juve chuan thlahna thuchhuah siamin, "Kan club tan hian number 3 hlutna hi a sang a, awmzia pakhat chiah a nei - chu chu Giorgio Chiellini tihna a ni. Mamawh huna awm reng ṭhin, kan mi leh sa i ni kumkhua tawh ang," an ti.