A hma aia ṭhain kan ti thei - Verstappen

Max Verstappen chuan season thar a thlirlawk a, amah leh a team Red Bull chun tun season aia ṭha zawkin an la ti thei tih a sawi - an elpui team dang tan chuan thu hriat nuam tak a ni kher lo ang.

Car intlansiakna sang ber season an hman zawh takah khan, team champion Red Bull hian vawi 22 zinga 21 zetah hnehna an chang. Dutch tlangval Max hi vawi 19 ngawt a chak a, a zawna vawi 10 ngawt chak tluan lai pawh a nei hial.

World champion Verstappen chuan, "Tun season aia ṭha zawk khan kan tlan thei ang, intlansiak vawi 20 a hnehna chan tlin ka sawina lam a ni lo a, a aia ṭha zawka tlan tih hian kawng hrang hrang a huap thei ang, a rah chhuahna erawh chak tam lamah a lang tur a ni ve bawk.

"Mimalin hma ka sawn a ngai dawn a, car ṭha zawk leh team ṭha zawk kan nei thei, kumina kan chak zat hi kan tlin tawh lo a nih pawhin kawng ṭhenkhatah hma kan sawi tho chuan a pawi lo," tiin a sawi.

Ruahman dan chuan nakkumah hian Formula 1 intlansiak 24 awm tura tih a ni a, an kaltlang thei a nih chuan kumin aiin intlansiak pahnihin a tam zawk dawn tihna a ni ang. A bul ṭan nan March thlaah Bahrain Grand Prix an tlan dawn a ni.