Player ṭha ber Swiatek

Hmeichhe tennis thuneitu sang - Women's Tennis Association (WTA) chuan mimal chawimawina a sam chhuak leh a, award ngaihhlut ber WTA Player of the Year chu Iga Swiatek hnenah hlan a ni a, a kum zawnin a dawng ta chiah a ni.

Tun hmain Serena Williams chuan kum 2012 aṭanga 2015 chhung kha a zawnin a lo dawng tawh. American star hnuah chuan Swiatek hi a zawna dawng leh thei hmasa a ni a, player ropui Serena sulhnu erawh tluk mai theih tur chi niin a lang rih lo.

Kum 22 mi Swaitek hian June thla khan French Open nomawi a kawl lai a humhim a, major title pali a lak tlinna chiah a ni nghal. Season khar nan a thiam zual pariat inelna WTA Finals-ah a vawi khat nan a champion leh bawk, atan kum ṭha tak tiin a sawi theih.

Duhthusama ṭha chuan season a hmang bik lo, world number 1 a nihna pawh Aryna Sabalenka lakah a hloh hman. Mahse, WTA Finals champion a nih leh tak avangin number 1 nihna pawh a luah let leh theih phah ta a ni.

Tun hnai season hnih chhunga Swiatek thawhpui, a hlawhtlin theih nana mi pawimawh tak pakhat Tomasz Wiktorowski chu Coach of the Year atan thlan a ni bawk, player leh coach te hi an sulhnu en chuan chawimawina dawn hi an phu hle.

Chinese nula Zheng Qinwen chu player hmasawn ber atan thlan niin, Russian mi Mirra Andreeva chu player chhuak thar ṭha ber a ni. Fa a neih hnuah tennis khel chhunzawm ve leh ta Elina Svitolina hnenah Comeback Player of the Year chawimawina hlan a ni ve bawk.