Club World Cup hmuhnawmna belhchhahtu Al Ittihad

FIFA Club World Cup chu December 12, Thawhlehni aṭang khan Jeddah, Saudi Arabia-ah khelh ṭan a ni a, match hmasa berah Al Ittihad chuan Auckland City 3-0 in an hneh. Saudi club tan Romarinho, N'Golo Kante leh Karim Benzema ten goal khat ṭheuh an khung a, French forward Benzema hian record thar siamin Club World Cup ṭum lia goal khung thei hmasa ber a ni.

FIFA World Cup-ah hian khawmualpui paruk champion bakah inelna thlengtu aiawhin club pakhat an tel bawk. Tun ṭumah hian Saudi Arabia-in an thleng a, Saudi Pro League champion Al Ittihad an tel a, Oceanian champion Auckland City nen first round-ah an inhmachhawn.

Al Ittihad hi a thlengtu nih vanga tel ni mah se inelna hmuhnawmna belhchhah theitu a ni. Kum dangah chuan European champion leh South American champion an langsar fal ṭhin a, kuminah erawh Al Ittihad hming lam rik tel a ṭul ta.

Saudi Pro League club-ten sum an hmang hnem a, Al Ittihad-ah pawh player langsar Karim Benzema, N'Golo Kante leh Fabinho te an awm. Club enkawltu pawh Marcelo Gallardo a ni a, Argentine coach hian Wolves leh Tottenham manager hlui Nuno Espírito Santo a thlak.

King Abdullah Sports City-a inkhelah entu an ṭhahnem a, Al Ittihad-in ṭan phat aṭangin Auckland City an nawr nghal. Saudi club-in inkhel an thunun rah an seng a, minute 29-naah Romarinho-a'n a kum 33 pianchampha phak lawm nan goal hmahruai a khung.

A tlan tam vang leh team tana ṭangkai vanga hriat lar Kante-a'n goal pawh a khung thiam tih a pholang a, minute 34-naah box pawn chiah aṭangin kawh zetin a volley goal. Auckland City an che thei lo a, Al Ittihad-in minute 40-naah passing mawi hmangin Auckland tlarhnung an ṭhiat a, Benzema-a'n goal thumna a khung.

Second half-ah Al Ittihad bawk an chungnung a, chance ṭhahnem tak a awm chungin goal dang hmuh tur a awm tawh lo. Al Ittihad-in semifinal-ah African champion Al Ahly an hmachhawn dawn a, hna a hautak hret tawh ang.

Club World Cup hi eng nge?

FIFA buatsaih Club World Cup hi khawvela club ṭha ber zawnna tiin a sawi theih a, khawmualpui hrang hrang champion bakah inelna thlengtu aiawh club an inel ṭhin.

Tun hma khan Inter-continental Cup a awm ṭhin a, he inelna hi kum 1960 aṭanga neih ṭan niin European champion leh South American champion te a inhmachhawn ṭhin.

Intercontinental Cup hi kum 2004 thleng neih a ni a, FIFA pawhin he inelnaa champion hi world champion-ah a ngai. Inelnaah hian AC Milan, Real Madrid, Boca Juniors bakah Uruguayan club pahnih Penarol leh Nacional te chu vawi thum ṭheuh an champion.

FIFA World Cup hi kum 2000 aṭang khan ṭan a ni a, a ṭan kum hian team 10 telin group pahnihah pali ve vea ṭhen niin a sang berin final an khel. Inelna hi Brazil-in thlengin treble champion zo hlim Manchester United-in first round an paltlang lo a, Intercontinental champion nih vanga tel Real Madrid pawhin third place an chuh pha chauh a, penalty-ah Necaxa an hneh lo.

Final-ah Brazilian club pahnih Corinthians leh Vasco da Gama te an inkhel a, hun pangngaia goal awm loa an inhnehtawk hnuah penalty shootout-ah Corinthians an vannei ta zawk. Inelna hmasa berah hian tuna Cristiano Ronaldo khelhna Al Nassr pawh an tel a, 1998 Asian Super Cup an champion vanga tel an ni.

Kum 2001 khan inelna hi Spain-ah neih chhunzawm tura ruahman ni mah se sum dinhmun ṭhat loh avangin an nei thei lo a, kum 2002-2004 chhung khan inelna neih a ni lo hrim hrim.

Kum 2005 khan inelna hi chhunzawm leh a ni a, kal dan an thlak. South American leh European champion ten semifinal an lut sa a, anni tan chuan champion turin match hnih chauh khelh a ngai. Hemi hnu hi chuan kum tinin inelna hi neih a ni.

Nakkum hian inelna neih a ni dawn lo a, kum 2025-ah chang-tlung zawkin neih a ni dawn. June–July, 2025 chhungin neih a ni dawn a, team 32 an tel tawh ang.