Europa League - Liverpool tan inenchhin hun

Union Saint-Gilloise khelmualah Europa League match khel turin Liverpool an leng dawn a, Jurgen Klopp-a naute hian round of 16 an luh chian tawh avangin zanin inkhel hi player enchhin nan an hmang ang.

Europa League-ah hian group tina a sang pahnihin last 16 an lut nghal ngawt lo. Group hmahruaitu chu a thiam 16 zinga a tel chiang an ni a, pahnihnaten knockout round playoff an tih chu lutin, hemi round-ah hian Champions League aṭanga tlate nen last 16 lut tur an zawng dawn.

Liverpool hian group-ah hmahruaitu dinhmun an luah chian tawh avangin Union SG laka an match khelh turin awmzia a nei thui tawh lo a, chutihrual chuan Union SG tan erawh beisei tur a la awm thung - Liverpool laka an chak a, inkhel danga Toulouse an tlawm chuan knockout round luh chance an nei.

Team langsar zingah AS Roma-in knockout round lut chiang tawh mah se, last 16 erawh lut lo thei dinhmunah an ding - Jose Mourinho-a team hian zanin dar 11:15-ah Sheriff Tiraspol an mikhual dawn a, an chak bakah midang result an ngaihchan tel a ngai thung.

Hmel thar chu?

Liverpool damdawi in a lun viau a, season ṭantir aṭanga hliam an neih sa Thiago Alcantara (khel bawr) leh Stefan Bajcetic (châwn) an awm a, Joel Matip (khup), Diogo Jota (tihrawl) leh Andrew Robertson (dar) te chu tun hnaia hliam an neih leh an ni bawk.

Mahse, zanin inkhel tur hian Liverpool tan pawimawhna a neih tlem avangin Klopp-a tan inenchhinna hun ṭha a ni a, hliam neih hi manganna tur niin a lang lo. A bik takin defender pawimawh Virgil van Dijk, Mohamed Salah leh goalkeeper ṭha mi Alisson te chu chawlh hahdamna hun pek an nih a rinawm.

Chuti a nih chuan tlarhmaah Darwin Nunez, Luis Diaz leh Cody Gakpo zinga a tu emaw ber an lut tura ngaih a ni a, Harvey Elliott chu lut chiang tura ngaih niin, kum 18 mi Ben Doak leh kum 19 mi Kaide Gordon hman pawh Klopp hian a châk viau ang.

Tlarhnungah centre back ṭhangduang Jarell Quansah, kum 20 mi right back Conor Bradley, England Under-19 left back Luke Chambers te tan hun ṭha a ni a, Reds ṭantute tan an hma hun hi eng ang taka êng nge a nih hriat nan, zanin hi inkhel en hun a ni.

AS Roma chu

Group G-ah Roma-in pahnihna dinhmun an luah mek a, zanin dar 11:15-ah Sheriff Tiraspol an mikhual dawn - group hmahruaitu ni turin an chak ngei ngei a ṭul a, inkhel lehlamah Slavia Prague-in Servette an ngam loh a ṭul tel bawk.

A tawi zawnga sawi chuan team dang result-ah AS Roma an innghat tel tawh a, a harsa tawh dawn. Mahse, Jose Mourinho-a'n knockout round playoff khelh buai a duh lo ang tih a chiang a, chak phawt an tum ang.

Hetihrual hian Roma hian Pathianni zanah Bologna nen Serie A match pawimawh an nei zui a, an league match hnuhnung berah player pahnihin red card an hmu bawk nen, rilrua Serie A dah reng chungin player rem a ṭul ang.

Fiorentina laka red card hmutu Romelu Lukaku-a'n Bologna a hmachhawn theih dawn chuan loh avangin Mourinho-a'n a khek a rinawm lo a, tlarhmaah Paulo Dybala leh Sardar Azmoun an inhliam bawk avangin Belgian striker hi Andrea Belotti nen inkawp tura ngaih an ni - Sheriff tlarhnung tan hmachhawn an châkawm dawn lo.