Auba-a'n goal a khung ve ta - an lamah!

Arsenal fan-ten tun season-a an captain Pierre-Emerick Aubameyang goal khung lai hmuh an châk em em a, mahse, September 2020-a contract thar ziaktu hian penalty puihna lo chuan goal a khung hleithei tlat lo. 

Mahse, Pathianni zan khan Gabonese striker hian goal a khung ve leh ta a, mahse, a goal khung dan erawh zan muttui lohna tham a ni thung - anmahni lamah a ni tlat!

Arsenal-in an mikhual Burnley chu 1-0 in an ngam lo a, inkhela goal awmchhun hi Aubameyang-a'n corner aṭanga ball kal minute 73-naa an lama a tauh luh a ni. Auba hian tun season Premier League-ah goal hnih chiah a la khung a, goal khat zawk hi penalty aṭanga a khung a ni. 

Arsenal-in goal an chhuah hian an kim tawh lo a, minute 56-naah Xhaka chu mawi lo taka a chet avangin hnawhchhuah a ni - Swiss midfielder hi Dwight McNeil-a tih tluk avangin yellow card pek a ni zet a, MCNeil nen hian referee inrawlh hmain an in chhang. 

Clarets midfielder Ashley Westwood chu buaina ṭhelh tumin a inrawlh a, Xhaka hian a lo rek - referee-in VAR-ah thil thleng a en nawn a, yellow card sutin red card a pe ta zawk. 

Arsenal an tlawm avangin table-ah 15-na an ni mek a, tun dinhmuna Gunners buaina chu season thara Champions League khelh leh khelh loh ai mah chuan relegation zone hlat dan tur a ni ang. 

Gunners boss Mikel Arteta chuan, "Game kan thunun a, mahse, keimahni bawkin kan thaichhe leh a ni. Red card-a awm tawh chuan game a danglam ṭhin a, goal khung tur hian eng nge kan tih ngai ka hre lo," tiin a beidawng hle.