Thlen china lungawi Arteta

Arsenal manager Mikel Arteta chuan Champions League an thlen chinah a lungawi tih a sawi a, chutihrualin last 16 chu an tawpna mai tur ni loin chona an hmachhawn tur a la nih zawk thu a sawi bawk.

Gunners hian an group match hnuhnung ber khelh hmain last 16 an lut chiang tawh, hei mai bakah hian Group B hmahruaitu an ni chiang tawh. Premier League an match hnuhung berah player chhawr pariat ngawt ti danglam chungin PSV Eindhoven an lenchilh a, 1-1 in an inhnehtawk.

Thawhlehni zan inkhelah Arsenal tan striker Eddie Nketiah-a'n chawlhlawk hma deuha a goal khung chu second half-ah PSV lamin Yorbe Vertessen hmangin an sut, goal dang lut tawh loin an inhnehtawk.

Group B inkhel dangah Lens chuan an mikhual Sevilla chu 2-1 in an hneh a, Spanish club hian group match an khelh hoah chak ni hmel an hmu miah lo. A sang ber Arsenal leh pahnihna PSV te an tlang a ni.

Gunners manager Arteta chuan, "Champions League kan khelh lohna hi kum ruk vel a ni tawh, chumi hnuah European football inelna sang han khelh leh chu a boruak pawh a danglam hle, ka naute tam zawk hian tawnhriat an nei lo, chuvangin tuna an thlen chin hi a lawmawm.

"Nakkum February thla a lo thlen chuan inelna hautak zawk kan hmachhawn a ngai dawn a, tuna kan hna kan hlen hmasak ai hian a harsa dawn, chutah tak chuan eng ang nge kan ni tih chu fiah a ni ang," a ti.

North London club hian Premier League lama an match hnuhnungah Aston Villa an ngam lo, an chak loh avangin hmahruaitu an nihna chu Liverpool lkah an chan a, tun kar tawpa Brighton an mikhual hunah UCL lama chhawr hah loh player ṭha rual an lut ang.