DLS Method hmangin South Africa chak

India leh South Africa ten T20 match hmasa ber ruahsur vanga an khelh theih loh hnuah Thawhlehni zan khan match nihna an khel a, Proteas hi wicket ngain an chak.

St George's Oval-ah South Africa hi ṭhumvawrah an chak a, vawm hmasak an thlang. India tan Yashasvi Jaiwal leh Shubman Gill ten run khatmah siam lo mah se captain Suryakumar Yadav-a'n 56 runs a siam a, Rinku Singh-a'n thi loin 68 runs siam bawkin over 19.3-ah 180/7 runs an siam.

Ruahsur vangin India an bat zo thei lo a, DLS Method hmangin South Africa target chu siamsak an ni. Proteas tan chak turin over 15-ah 152 runs siam a ngai a, opener Reeza Hendricks bul ṭan ṭhat zarah hnehna an chang. Hendricks hian ball 27 lekah 49 runs a siam a, Aiden Markram-a'n ball 17-ah 30 runs siam bawkin over 13.5-ah 154/5 runs siamin hnehna an chang.

Zanin dar 8:30 hian match thumna leh a tawpna ber khelh a ni dawn a, India hian hnehna an chang a nih chuan South Africa hi an nihrual thei ang. T20 series zawh hian ram pahnih hian ODI match thum an khel leh dawn a ni.