A vawi thum nan Green hnawt chhuak

Golden State Warriors forward Draymond Green chu tun NBA season kal laia a vawi thum nan hnawhchhuah (eject) a ni a, nimin zing inkhelah a team hi Phoenix Suns lakah 119-116 in an chak lo.

Quarter thumna khelh laiin kum 33 mi Green hian vir pahin a hnung lama awm Suns centre Jusuf Nurkic chu a biangah a beng a, thil thleng hi ennawn a nih hnuah an hnawtchhuak.

Thla hmasa mai khan Minnesota Timberwolves centre Rudy Gobert laka a chet dan vangin Green match nga chhung khel thei lo tura hrem a lo ni tawh bawk.

Warriors coach Steve Kerr chuan, "Draymond hi kan mamawh, hetiang thil thleng lo tura a chet a ngai a, chumi tur chuan kan inbiak pawh a ngai. Player ṭha a la ni reng, team tan engtiangin nge a ṭangkai zual ang tih kan ngaihtuah chhuah a ngai," a ti.