Real Madrid an chak vek

Champions League-a record nei ṭha ber Real Madrid chuan Thawhlehni zan khan Union Berlin chu 3-2 in an hneh a, Spanish club hi group stage match rukah an chak vek.

Olympiastadion Berlin-ah Kevin Volland-a'n mualneitu tan first half injury time-ah a khung a, Real Madrid-in Joselu-a goal hnih hmangin an lehthal. Minute 85-naah Berlin-in Alex Kral hmangin siphurh an sut a, 2-2 a inhnehtawk thei dinhmuna an din hnuah Madrid tan Dani Ceballos-a'n chakna goal a khung.

Ceballos-a goal khung hi Jude Bellingham-a pek a ni a, English midfielder hi Los Blancos tan a pawimawh ṭhin hle. UCL-ah Real-in 100% chak record an nei a, La Liga lamah an insawrbing a ṭul rih ang. Match 16 khelh zawhah point 39 hmuin pahnihnaah an awm mek a, pahnihna Girona chu point hnihin an pha lo.

German club Berlin hi chak se Europa League khel thei tur an ni a, amaherawhchu point an hlawh chhuah loh avangin table mawngphahah an awm a, Europe inelna an tel zui dawn lo.