MPL aṭangin Venghnuai FC an tla

Nimin tlai Zote Toyota MPL10 inkhelah FC Venghnuaiin Aizawl FC 2-1 in an hneh lo a, Mizoram football inelna sang ber aṭangin an tla. RG Stadium-a inkhelah I League club tan Augustine Lalrochana'n goal hnih a khung a, Venghnuai tana J. Lalbiakliana (Valpuia) goal khungin result a tidanglam pha lo.

Venghnuai tan MPL-a inhamtang turin chak an mamawh a, I League club lakah pawh an ṭang thei hle. Mahse, second half ṭantirha Aizawl FC tana Lalrinzuala leh Lalthankhuma te luh hnuah an talbuai a, AFC tan Augustine-a'n minute thum chhung lekin goal hnih a khung.

Goal hnih chhuah hnuah Venghnuai insiamṭha a, Valpuia'n goal a khung. Mahse, Venghnuai hian goal khat chauh an khung thei a, chance ṭha dang insiam mah se an khung belh lo.

Venghnuai hian coach Lalrindika Hmar hoin MPL an inpettling a, MPL8 aṭanga khel ṭanin MPL9-ah final an lut. Kuminah Rindika'n Chawnpui FC a pan a, MPL khel zel turin Venghnuai an inhamtang zo ta lo.