Palace-in Spurs an chelh ding

Tottenham Hotspur-in tun season Premier League-a fiahna hautak ber tur tia chhal ngam chu Nilaini zan dar 1:30-ah an hmachhawn dawn a, Anfield-a tlawm duh lo Liverpool an lenchilh dawn. 

Mahse, Spurs-in Liverpool hmachhawn tura inbuatsaihna match an neihah point thum an hlawh chhuak zo lo a, Crystal Palace khelmualah 1-1 in an inhnehtawk hram. 

Spurs tan Harry Kane chuan minute 23-na lekah goal hmahruai a khung a, a siamsaktu chu Son Heung-Min bawk a ni. Hun tawp nan minute kua chiah a awm tawh tihin Palace-in si phurh an sut a, Hugo Lloris chetsual vang a ni. 

French keeper hian Eberechi Eze-a freekick naran tak chu a man nghet zo lo a, hei hi Jeffrey Schlupp chuan remchangah lain Palace tan si phurh a sut. 

Player sawisel hreh lo tak Mourinho chuan a keeper hi chhan tlatin, "Kan goalkeeper hi Premier League-a ṭha ber a ni a, Premier League-a keeper ṭha ber hi sawiselna tur ka hre lo," a ti hmiah!

Spurs hi an vanduai tia sawi theih a ni a, Palace tan keeper Vicente Guaita-a che ṭha takzet. Spanish keeper hian Tanguy Ndombele, Sergio Reguilon leh Kane-a te shot ṭha tak chu an goal hmasa ber an chhuah hmain ṭha zetin a dansak vek. Eric Dier-a freekick a dan phei chu tun season Premier League-a save ropui ber ang hiala chhal ngam a ni - Ben Davies chuan bar a tih per bawk.  

Chutihrual chuan Palace-in draw result an phu lo tih chi a ni bik lo a, Roy Hodgson-a enkawl team tana Wilfried Zaha-a shot chu Lloris chuan ṭha zetin a dansak a, Christian Benteke chuan vawi hnih chance duhawm a hlah bawk. 

Spurs boss Jose Mourinho chuan, "Inkhel kha kan en chuan first half tir lamah chak tum zawk kan ni a, point hnih kan hloh angin a sawi theih. Mahse, second half minute 30 tir lam kan en chuan Palace khan goal khung an phu a, result fair tak a ni. Mahse, minute tawp lam 15 en leh ila, chak kan phu leh si a ni," a ti a, inkhel a sawifiah thiam hle.