Semifinal-ah Aizawl FC tan hmun a awm lo Chanmari Vs Chawnpui; Police Vs Chhinga Veng

Zote Toyota MPL10 chu nimin khan league round khelh zawh a ni ta a, Chhinga Veng FC-in league match hnuhnung bera Chanmari FC an hneh avangin Aizawl FC zuan khumin semifinal an lut. I League club Aizawl FC erawh MPL-a semifinal awm hnua a vawi khat nan knockout stage an lut pha lo.

RG Stadium-a inkhelah MS Dawngliana'n minute 88-naah Chhingcows chakna goal a khung a, Lalsangzuala Hmar hoten Chanmari FC 1-0 in an hneh. Chanmari erawh chak lo mah se pakhatna nichungin league round an khar a, coach Laldampuia tan erawh CFC a enkawl hnua a chak lohna hmasa ber a ni.

Thil awm dan

Chanmari FC, Mizoram Police FC leh Chawnpui FC ten round 14 khelh hmain semifinal an lut tawh a, Police leh Chawnpui ang thoin Chanmarians pawhin league match hnuhnung berah player pawimawh an awltir.

Captain Lalrinchhana Tochhawng, goalkeeper ṭha Zothanmawia bakah player pawimawh ṭhenkhatin entu zing aṭangin inkhel an thlir a, starting eleven-ah rinrawl an lo tiin a sawi theih.

Chhinga Veng erawh coach-in ṭha thei ber tura a ngaih angin an lut a, defender Vanlalremruata hrem vanga a khelh theih loh avangin defence laiah FC Lalhmunmawia kiangah right back Lalruatdika (Teka) chu defence laia dah a ni.

Chhingcows hi head to head-ah Aizawl FC aia an ṭhat avangin semifinal lut turin draw a tawk. Point khat an hlawhchhuah chuan semifinal-ah Chanmari nen inkhel tur an ni a, an chak erawh chuan Chawnpui FC nena inkhel tur an ni thung.

Keeper Danmawia

Chanmari squad a chhah ṭhat avangin player inlante pawh theihna sang tak vek an ni a, heng player-te hian hun ṭha bawhpelh an tum lo. Chak tumin Chhinga Veng an hmachhawn a, goal venhim an uluk ang thoin goal khung tumin an nawr.

Chutihrualin point mamawh Chhingcows-in inkhel an thunun bik thei lo a, chance ṭha erawh an ngah hret. MS Dawngliana'n Lallawmsanga hnen aṭanga a ball hmuh a hmang ṭangkai thei lo a, Isaak Malsawmkima pawh box chhunga ball a lak sual avangin engmah loah a chhuah.

First half-ah goal a lut lo a, second ha

lf-ah Chanmariin an fimkhur loh an tuar. Goalkeeper Malsawmtluanga chhuah laiin ball an in pass sual a, Dawngtea'n ball changin goal-ah a pet. Box pawn aṭangin keeper MS-a'n a kutin a ti per a, minute 55-naah hnawhchhuah a ni.

Chanmariin bench-ah goalkeeper an dah loh avangin R. Laldanmawia a rawn lut a, Sialhawk Express tia hriat lar hian glove a rawn bun thung. Danmawia hian hna a nei meuh lo a, a neihchhunah a ti ṭha. Player 10-a khel Chanmari goal hmaah an hlauhawm zawk.

Mahse, minute 88-naah Santosh Trophy-a Mizoram forward PC Lallawmkima hnathawh ṭhat zar zoin Dawngtea'n box chhung chiahah ball a chang a, goal kilah a pet lut. Danmawia inkhawh ṭha viau mah se Chhinga Veng captain pet hi a dang pha lo.

A ngaihnawm dawn

Chhinga Veng coach Lalsangzuala Hmar hi champion dan hria a ni a, MPL-ah club hrang pathum a champion pui tawh. Season liam ta khan mak takin Chawnpui FC a champion pui a, tun season-ah Chhinga Veng chu phase 1-ah chet chhiatpui mah se match 14 khelh zawh meuh chuan pathumna a nihpui.

MPL10 semifinal lut team enkawltu zingah Sanga chiah hi champion tawh a awm a, a khingpui tur hi coach Lalbiaksanga Colney enkawl Mizoram Police an ni dawn. Sanga leh BS-a Colney enkawl inkhel tur hi chu a hmuhnawm dawn.

Chanmari FC-in Aizawl FC an pumpelh a, an khingpui tur hi Chawnpui FC an ni. Chawnpui hi season liam taa Venghnuai final hruai thlengtu Lalrindika Hmar enkawl a ni a, Dampuia kaihhruai Chanmari tan a awlsam lo ang. Semifinal hi December 18-19, 2023 zan dar 8:00-ah khelh a ni dawn a, zan boruak a nih dawn avangin RG Stadium-a inkhel en a nuam khawp ang.