A tawpah Electric Veng a êng

Zote Toyota MPL10-ah Electric Vengin match hnuhnung berah Chawnpui FC 2-1 in an hneh a, EFC hian a hunah tak an theihna an phochhuah avangin Mizorama football inelna sang ber an khel dawn. MPL aṭangin table hnuai bera awm FC Venghnuai an relegate a, pasarihnaa awm Project Veng FC erawh an la him lo. Kolasib club tan MPL khel chhunzawm turin relegation playoff an khelh a ngai ang.

Boruak a sang

Electric Veng hian phase 1 khelh zawhah point sarih an hmu a, paruknaah an awm. Mahse, phase 2-ah EFC hian bul an ṭan ṭha lo. Match nga a zawnin an chak lo a, table mawng berah an tla thla.

EFC hian an elpui FC Venghnuai leh Project Veng FC te an hneh lo a, Kolasib club hi 4-2 ngawta an hneh loh avangin head to head-ah an tluk lo. Hei vang hian Electric Veng tan hmabak a harsat phah a, match hnuhnung pahnihah team ṭha Aizawl FC leh Chawnpui FC an hneh ngei a ṭul.

Mahse, Electric Veng hian semifinal khelh tuma chak mamawh Aizawl FC chu 2-1 in an hneh. Heti chung hian EFC tan Chawnpui hneh a la ngai a, goal chhuah hmasa mah se 2-1 in an lehthal.

Comeback chu

Chawnpui FC-in semifinal an luh tawh avangin player ṭhenkhat an hahdamtir a, bul ṭantu zingah Lalruatfela leh Lalhmangaihsanga te an la tel. Elecrtric Veng erawh an ṭhat dan berin an inrem.

Minute 23-naah Chawnpui right back Lalbiaknia Royte corner pet chu Lalramnunmawia'n a tauh lut a, Electric Veng tan hmabak a harsa ta hle. Mahse, EFC an beidawng lo a, chance an insiam ve reng. Minute 28-naah goal khungtu Ramnuna'n EFC defender ball petchhuah satliah chu a tauh let fuh tawk lo a, EFC captain C. Lalhriatpuia'n remchangah lain si phurh sut nan a hmang.

Goal chance hmuh tur a awm a, goal erawh minute 63-naah a lut leh chauh. Emmanuel Lalhruaizela ball vawrhluh chu box chhunga awm KC Malsawmsanga'n tauh zeuhin goal kilah a lut. Electric Vengin chance ṭha dang an khung belh lo a, chutihrualin a pawimawh ber an goal neih an hum tluan a, 2-1 in hnehna an chang.

EFC an lawm

Electric Veng FC president leh team manager F. Lalhmangaihsanga (Duata) chuan, "Tluang taka MPL10 kan zo thei hi kan lawm a, a hmasa berin min kaihruaitu Pathian chungah lawmthu kan sawi. Tun season-a kan thawhpui Aizawl South Football Academy (ASFA) leh ṭanpuina thilpek min petute zawng zawng leh min support tu te zawng zawng chungah thinlung takin lawmthu kan sawi," tiin Vanglaini a hrilh.

Electric Veng hian MPL7 aṭangin Mizorama football inelna sang ber hi an khel ṭan a, MPL8 khan Lalsangzuala Hmar kaihhruaina hmangin final lut mah se Aizawl FC lakah an vanduai. Tun season-ah EFC hi Aizawl South Football Academy (ASFA) nen an thawk dun a ni.

EFC president Duata'n sawi chhunzawmin, "MPL khel chhunzawm leh zel thei tura kan awm hi kan lawm a, chutihrualin inhamtang hram ringawt loa champion tum thei dinhmuna awm theih a châkawm hle. Chumi tur chuan veng mipuite a hma aia nasa zawka ṭangrual turin kan insawm tak meuh meuh a ni," tiin season thara mipui thlawpna an mamawh thu a sawi.