Aizawl FC-in ticket titlawm

Aizawl FC-in December thla hian I League match hnih khelh tur an nei a, December 16, Inrinni zan dar 7:00-a Gokulam Kerala nena an inkhel en man hi Rs 100 a ni ang. Mizo club hian tun season-ah an mualah I League match hnih an khel tawh a, RG Stadium-a inkhel en man hi match hnihah hian Rs 200 ve ve a ni. Tun ṭumah erawh 50% in inkhel en man hi an tihniam a, an result a ṭhat bawk avangin entu an tam ngei pawh a beiseiawm hle.

Mizo club khingpui tur Gokulam Kerala hian match kua aṭangin point 13 an hmu a, table-ah paruknaah awm mek mah se an budget a san avangin team ṭha zinga mi an ni. Aizawl FC hian Gokulam an hmachhawn zawh hian December 21, Ningani zanah Inter Kashi an mikhual leh ang.

Ticket hi inkhelh zan dar 5:00 aṭangin RG Stadium-ah a lei theih dawn. Mizo club jersey hi TLC Market Building, Zion Street-ah lei tur a awm bawk.