Gtea'n SPS Level 1 zo

Basketball Federation of India (BFI) chuan a vawi khat nan FIBA Sports Performance Specialist Programme Level 1 Certification Course chu December 12-13, 2023 chhung khan Chennai, Tamil Nadu-ah a buatsaih a, MBBA tirha kal Lalbiakzuala Khenglawtin (Gtea) ṭha takin a zo.

FIBA SPS Level 1 hi ni hnih awh chauh a ni a, Level 2 leh Level 3 a la awm. Level 2 hi ni nga awh tur niin Level 3 hi ni riat awh tur a ni dawn a, BFI-in a buatsaih leh hun tur hi a la hriat loh.

Tun ṭumah hian State Association-in aiawh pakhat an tir thei a, training-ah hian mi 25 telin FIBA instructor Amir Eid hnuaiah training hi an nei. Amir Eid hian strength and conditioning coaching lamah tawnhriat ṭha tak a nei a, kum 2022 aṭang khan FIBA-ah Program Developer leh Lead Lecturer hna a chelh.

Trainee zingah hian Indian senior team mipa coach Veselin Matic pawh a tel. BFI president Aadhav Arjuna chuan, "Programme hi coach leh trainer ṭha neih nan a ni a, tuna player naupang zawkte hian training dan phung dik zawk an zawh theih nan hei hi a pawimawh a ni. Kalphung dika kan zawh chuan kum 15 chhungin Asia-ah no. 2 emaw khawvelah top 10 emawa inhlankai kan tum dawn a ni," tiin tum sang tak an neih thu a sawi.

Bethlehem Veng tlangval Gtea chuan, "Hmasawnna tur a la tam khawp mai. Theihtawp kan chhuah zel ang. MBBA-in min duhsak a, an aiawha training tura min thlan avangin ka lawm, " tiin Vanglaini a hrilh. Gtea hi baskebtall player langsar Lalrina Renthlei bakah boxer NT Lalbiakkima, footballer Jerry Lalrinzuala, Laldinliana Renthlei leh K. Lalṭhathanga bakah infiammi engemaw zatin personal trainer atan an hmang tawh a, Mizo infiammite hmasawn nan a thawh hlawk hle.

MBBA pawhin thuchhuah siamin GTea'n SPS Programme ṭha taka a zo chu an lawmpui thu an sawi ve bawk.