Newcastle leh Milan beiseina a thamral
Champions League group match hnuhnung ber an khelh thlengin Newcastle United leh AC Milan ten last 16 luh beiseina an nei a, mahse an tum ram a thleng zo ta lo. Group F aṭangin Borussia Dortmund leh Paris Saint Germain te an tlang.
AC Milan chuan an tih theih sang ber hnehna an chang, an mikhualna ramah Newcastle 2-1 in an hneh - Magpies beiseina a tawp nghal. Amaherawhchu, inkhel dangah PSG chuan an mamawh tawk point khat an lo hmu ve tho a, point hmuh zat inangah Italian club hi PSG aiin an dinhmun a hniam ta zawk.
Inkhel pahnih chu
England ramah Newcastle United chuan AC Milan an mikhual a, minute 33-naah Joelinton hmangin goal an khung, box chhunga a ball hmuh chu hlap nuam tawk chiaha lo dang perin goal kilah ṭha zetin a hlap lut.
German ramah Borussia Dortmund chuan Paris Saint Germain an mikhual a, minute 51-naah Karim Adeyemi hmangin hma an hruai. Hetih lai hian Dortmund leh Newcastle te hi Group F hmahruaitu leh pahnihna niin, goal dang lut lo se an tlang ang.
Ligue 1 champion PSG lamin goal an phurh aṭanga minute nga hnu lekah Warren Zaire-Emery hmangin an sut, kum 17 mi Zaire-Emery goal vangin an la tlang ngawt lo, head-to-head nei ṭha zawk Newcastle bawk chu tlang tur an la ni tho.
Mahse, Eddie Howe naute tan thil pawi a thleng. An mikhual Milan lamin Christian Pulisic hmangin si phurh an sut a, table lama an dinhmun a hniam nghal - hun tawp dawna Samuel Chukwueze-a'n a khung leh phei kha chuan tlang thut thei kha a hniam berah an awm ta a ni.
Magpies ruh a no
Newcastle United hi tun hma chuan team hlauhawm an ni ṭhin, hun rei tak hnuah an insiamṭha leh mek a, manager Eddie Howe kaihhruaina hnuaiah hna pawh an thawk ṭha. Mahse, European football inelna sang berah meuh chuan an ruh a la no hle.
Milan an mikhual ṭum hian fans lamin UCL khelh chu an mumang leh duhthusam a ni ngawt lo a, suangtuahna sang leh ropui an neih thu an tarlang. Theihna chu an nei ngei mai, mahse an khelmuala PSG an hneh bak chu match vawi ruk an khelhah chak ni hmel an hmu lo.
Magpies manager Howe chuan, "A tawpa kan awmna chu a na kan ti hle, team pahnih khan chak tumin theihtawp takmeuh kan chhuah. Hnehna chang chung ngeia Champions League last 16 luh kha kan châk a, tum pawh kan tum nasa.
"Tih ṭhat tam tak kan nei a, a pawi lai chu kan goal chhuah pahnih kha chu keimahni lam inven ṭhat tawk loh vang a ni," a ti. Joelinton pawhin an tum ram thleng zo ta chiah lo mah se kar tawpa Fulham nen Premier League an khelh tur atan rilru an pek a ngaih thu a sawi ve bawk.
Hello Europa
Italian chanchinbu tam tak chuan Milan leh Newcastle inkhel tur kha Stefano Pioli hma hun hril thei tur an nih thu an sawi a, an chak loh chuan a hna chân mai tura ngaih a ni - mahse Milan a enkawl chhunzawm dawn niin a lang.
AC Milan manager Pioli chuan, "Kan awmna group hi a danglamin a harsa hle tih pawh kan hria, season hmasa lama ṭha taka kan kal tawhna nena khaikhin pawhin a danglam kan ti hle. Theihtawp chhuah mah ila kan elpui dangten keini aiin an ti ṭha tlat si a ni.
"Newcastle laka kan thawh chhuah leh dan kha a lawmawm a, a awmzia chu Europa League lamah ṭha takin kan khel chhunzawm thei dawn tihna a ni. Magpies hian tun season chhungin an mualah Dortmund leh Liverpool chiah hneh loh an nei, chumi hmunah chuan kan chak thei," a ti.
Milan hian England ramah sulhnu an nei ṭha tawk lo, kum 2005 khan Manchester United khelmual Old Trafford-ah 1-0 in an lo chak tawh, a dangah chuan an chak ngai lo, vawi 13 tlawm zawkah ṭangin ṭum sarih chu an inhnehtawk.
PSG ṭha zawk tiamtu Enrique
Kylian Mbappe neitu an ni a, tunlai khawvela hmatawng hriam leh hlauhawm berte zinga mi a ni - mahse Paris Saint Germain hian hnehsawh takin Ligue 1 an thunun thei bik rih lo a, Champions League lamah phei chuan group stage paltlang turin vanneihna an mamawh tel.
Lionel Messi leh Neymar nei chung pawha an hlawhtlin theih lohna a nih avangin PSG tan UCL hi a awlsam lo, last 16 an luh takah chuan coach Luis Enrique chuan Paris team hmuhnawm leh ṭha zawk chhawpchhuah theih a inring.
Dortmund lakah ball possession 60% an chang thei a, goal khung tumin ṭum 18 tehmeuh an 'shot' bawk. Enrique chuan, "Team tam takin harsatna an lo tawh ṭhin tawhna hmunah kan lenglut a ni a, midang ang bawkin goal khung kawngah buaina kan tawk.
"Ka hmuh dan chuan group harsa berah kan awm a, chumi aṭang chuan kan talchhuak thei hi thil ṭha a ni. Nakkum February thlaah last 16 kan khel dawn, chumi hunah chuan team ṭha zawk kan ni ang, chumi tur chuan tawnhriat ka ngah tawk tawh a ni," a ti.
Group harsa ber tia sawi ni mah se Dortmund hi khelh hmabak pakhat nei chungin an tling chiang der tawh a, Bundesliga club hian inelna an hmangṭha tawk tih a chiang a, an phu ang ngeiin a chung berah an awm tluan.
Dortmund coach Edin Terzic chuan, "Team ṭha Paris Saint Germain kha ṭha takin kan dang bet thei a, hlauthawng lutuk loa kan awm tluan thei khan kan khel ṭha tih a nemnghet. Group hautak paltlang turin kan thawkrim a, a rah kan seng ta a ni," a ti.
Group hmahruaitu an nih avangin last 16 an pawh dawnah seeded pakhatna an ni dawn, group danga pahnihna nen an intum thei ang. PSG erawhin group dang hmahruaitu an tum a ngai dawn.
UCL Thlirna Tawi
Tling: Bayern Munich, FC Copenhagen, Arsenal, PSV, Real Madrid, Napoli, Real Sociedad, Inter Milan, Atletico Madrid, Lazio, Borussia Dortmund, PSG, Manchester City, RB Leipzig, Barcelona, Porto
Europa League: Galatasaray, Lens, Sporting Braga, Benfica, Feyenoord, AC Milan, Young Boys, Shakhtar Donetsk
UCL Draw: Last 16 inkhel tur hi December 18, Thawhṭanni hian Nyon, Switzerland-ah pawh a ni dawn. Pot khata mi hi an inhmachhawn thei lo a, ram khata mi an inhmachhawn thei lo bawk.
Pot 1 (seeded teams, group winners): Bayern, Arsenal, Real Madrid, Real Sociedad, Manchester City, Barcelona, Dortmund, Atlético
Pot 2 (unseeded teams, group runners-up): Copenhagen, PSV, Napoli, Inter, RB Leipzig, Porto, PSG, Lazio