Ball boy aṭanga UCL goal khungtu Hamilton

Manchester City chuan Real Madrid hnung zuiin UCL group stage-ah hnehna an chang vek. Nilaini zan khan Red Star Stadium, Belgrade-ah City hian mualneitu Red Star Belgrade chu 3-2 in an hneh a, Pep Guardiola hote hi match rukah vawi ruk an chak a ni.

City hian group match hnuhnung berah player ṭha ṭhenkhat an awltir a, kum 20 mi pahnih Oscar Bobb leh Micah Hamilton te chu mit la zual niin goal an khung ve ve. Hamilton hian goal hmahruai a khung a, minute 19-naa goal a khung danah theihna sang tak a nei tih a lang.

English winger Hamilton hian box chhungah vengtu a nei chungin petna tur khawp a insiam a, kawh zetin a pet goal. A hnu lamah pawh Hamilton hi a hmuhnawm zui. Oscar Bobb pawhin theihna a nei tih pholangin rilru fim takin box chhungah ball a la lut a, goal kilah a dah.

City tan Kalvin Phillips-a'n penalty aṭangin a khung belh a, Red Star Belgrade tana Hwang In-beom leh Aleksandar Katai te goal khung chu scoreline timawitu chauh a ni.

English club tana goal hmahruai khungtu Hamilton hi September 2017 khan social media lamah a lar tawh a, City-in Crystal Palace 5-0 a an hneh ṭumin ball boy-ah a ṭang a, kum 13 mi lek niin Pep-a'n a be lai chu a lar hle.

Tunah erawh City tan a khel a, goal a khung bawk. Pep chuan, "Goal mawi a ni a, a khel ṭha bawk. Ka lawmpui hle. Training-naah a theihna a lantir ṭhin a, goal a khung bakah penalty a hlawh chuak," tiin Hamilton a fak.

Manchester City hian December 16, Inrinni zanah Crystal Palace an mikhual ang a, hemi zawh hian FIFA Club World Cup khel turin Jeddah, Saudi Arabia an pan ang.