A vawi khat nan CAM award an sem : Cricketer of the Year atan Joseph Lalthankhuma

Cricket Association of Mizoram (CAM) chuan a vawi khat nan Nilaini zan khan Dawrpui Multipurpose Hall-ah CAM Award a sem a, 2022-2023 season chhunga an chetvelna aṭanga teh a ni.

Award ngaihhlut Men’s Cricketer of the Year atan Ramhlun Venglai tlangval Joseph Lalthankhuma thlan a ni. Durtlang nula Ramengmawii chu Women’s Cricketer of the Year atan thlan a ni thung.

CAM chuan award organising committee a din a, an kalphung tur pawh Apex Council lamin a duang vek. Committee-ah hian CAM Honorary Secretary leh Joint Secretary te bakah mipa, hmeichhia leh junior selection tina Chairman te bakah umpire leh tournament Chairman te an tel a, anni hian an thlang chhuak.

Cricketer of the Year atana thlan Joseph Lalthankhuma hian, season hmasa khan BCCI hnuaiah bik T20 match vawi sarih a khelh aṭangin run 93 a siam a, first class cricket-ah match ruk aṭangin run 216 a siam, a siam hnem ber ṭumin Arunachal Pradesh lakah run 73 a vaw chhuak.

RVL tlangval Lalthankhuma chuan, "Lawmman hlu tak dawng theia min siamtu Pathian chungah ka lawm a, ka chet dan min ngaihhlut saktu CAM chungah ka lawm bawk. Ka ṭhian leh chhungte min thlawpna vanga tun dinhmun thleng thei ka ni bawk.

"Kohhran leh KṬP ten min ṭawngṭaipui ṭhin a, hei hi ka chakna hnar pakhat a ni. Ka khelh mekna Ramhlun Venglai Cricket Club hian engkim min tihsak a, he club hian tun hun hi min hruai thleng," tiin Vanglaini a hrilh.

BCCI bakah CAM hnuaiah season hmasa khan Mahuma Memorial khelin match vawi thum aṭangin run 233 a siam a, wicket thum a la bawk. MCL-ah run 183 siamin wicket ruk a la a, tuna award dawng tur hian Bobby Zothansanga, Chaltlang leh Jehu Anderson, Dawrpui Vengthar te a khum.

Ramhlun Venglai aṭangin K. Vanrotlinga chu Junior Cricketer of the Year (Men) atana thlan niin, Emerging Player of the Year atan RVL player tho Johan Lalbiakkima thlan a ni bawk a, award hmasa berah RVL an langsar hle.