Al Ahly hmaah Al Ittihad fiahna

FIFA Club World Cup second round chu zanin hian khelh chhunzawm a ni dawn. Zanin dar 8:00 hian Mexican club Leon leh Japanese club Urawa Reds te an inkhel dawn a, dar 11:30-ah Eygptian club Al Ahly leh Saudi club Al Ittihad te an inkhel thung ang.

Second round khel tur club pali zinga pathum hi mahni khawmualpui champion an ni a, Al Ittihad erawh a thlengtu ram nih vanga tel niin 2022–23 Saudi Pro League champion an ni thung. Al Ittihad hi a thlengtu nih vang chauha tel ni mah se khawvel player langsar ni pha an kawl avangin ngaihven an hlawh hle.

Al Ittihad hian first round-ah Oceanian champion Auckland City chu 3-0 in a hneh a, goal khungtu zingah N'Golo Kanté leh Karim Benzema te an tel. Al Ahly an hmachhawn hunah pawh Kante leh Benzema ten en bik an hlawh ang.

Chutihrualin Al Ahly hi Club World Cup-ah an mikhual lo a, kumin chhiar tel lohin vawi kua zet an tel tawh. Final em la thleng lo mah se semifinal erawh ṭum nga lai an thleng tih hriat a ṭha.