Spurs vs Forest - Tu nge tho hlen dawn?

Zaninah Premier League match khat khelh tur a awm dawn a, Nottingham Forest-in zan dar 1:30-ah Tottenham Hotspur an mikhual dawn - team pahnih hi tun hnaia beisei ang result nei lo, an match hnuhnung bera insiamṭha an ni a, zawhna awm chu, "Tu zawk nge tho hlen dawn?" tih hi a ni.

Forest hi league match nga zet a zawna an tlawm hnuah, an match hnuhnung berah Wolverhampton Wanderers chu an inhnehtawkpui hram a, an insiamṭha tia sawi theih a ni - fans-in an hmuh duh erawh an chak lai a ni thung.

Boruak a ṭha chho ṭan dawn chauh tihah Spurs ber kher an mikhual dawn a, a awlsam dawn lo. Chutihrual chuan an league match hmasa sawma tlawm nei lo Spurs hi a zawnin match nga zet an chak zo lo hman!

Mahse, anni pawh an insiamṭha leh tawh a, an match hnuhnung berah team ṭha Newcastle United chu 4-1 in an sawp. Spurs-in an inrintawkna an nei let leh tawh angah a sawi theih a, inkhel en châkawm a ni.

Dinhmun derthawng

Nottingham Forest-in league match 16 khelh tawhah point 14 chiah an la nei a, table-ah 16-na an ni mek - relegation zone aṭanga an himna hi point nga chiah a ni a, season thara Premier League khel chhunzawm turin result thlak danglam an mamawh.

Fulham laka 5-0 ngawta an tlawm phei kha chuan Steve Cooper ban duhna official zingah a awm tawh a, mahse, fans lamin English top flight league-a hruai thlengtu coach hi an la thlawp miau avangin ban a ni ta lo.

Wolves nen an inkhelh dawn khan an tlawm leh a nih ngat chuan Cooper hi ban a ni dawn, niin khawthlang media-te chuan an tarlang a, Wolves boss hlui Julen Lopetegui chu amah thlak tura hming lam rik a ni hman hial.

Mahse, Cooper-a'n Wolves lakah draw result a hlawh chhuak a, a him - zaninah a tlawm a nih erawh chuan ban theih dinhmunah a ding zui leh dawn tih a chiang a, nipuiah player lakluh nan pound maktaduai 100 chuang a sen avangin a chunga club neitute an dawhthei lo deuh a nih pawhin a awm lo hran lo.

Spurs thawhlehna!

Rin hlawh lo Ange Postecoglou hoin Spurs-in season bul an ṭan a, league match hmasa 10-ah an tlawm lo a ni mai lo - coach Postecoglu pawh thla thum chhung a zawnin manager of the month-ah thlan a ni hial.

Mahse, Spurs hlim chhung chu chhum rei lotê lo lang a, ral leh ang mai a ni a, a hnu match ngaah vawi li tlawmin, vawi khat draw an nei. Heng match ngaah te hian goal hnih an chhuah tling vek a, an dinhmun a chhe hman hle.

London club hian rei tak mutthluk erawh an tum lo. An match hnuhnung berah Premier League club ṭha pawl Newcastle United chu 4-1 in an sawp a, theihna sang tak an la nei reng tih an pholang.

Champion hial sawi ri hman Spurs hi tunah chuan table-ah pangana an ni mek a, hmahruaitu Liverpool chu point sarih laiin an phak lo mek - season tira an mumang neih hman kha a tak ram chantir tur chuan an tlawm a thiang tawh lo.

Damdawi in lun

Spurs hi tun hnaia an result ṭhat loh chhan pakhatah hliam an ngah lutuk chu puh theih a ni. Tun dinhmunah hian Alfie Whiteman (ke rêk), Manor Solomon (khup), Ivan Perisic (khup), Ryan Sessegnon (malpui), James Maddison (ke rêk), Rodrigo Bentancur (ke rêk), Ashley Phillips (ke rêk), Micky van de Ven (malpui) leh Eric Dier (ṭhâl) te chu hliam vangin an chawl mek.

A tawi zawnga sawi chuan Spurs-in player hliam an kawl zat ringawt pawh hi khawte run tham zet an ni a, eng team tan pawh heti zat hliam neih hi chhiatpui tham a ni - mahse, chuti lam ngaihtuah erawh a hun tawh lo.

Tlarhmaah tun season-a league goal 10 khung tawh Son Heung-min chu innghahna a ni leh dawn a, Magpies laka goal hnih khungtu Richarlison pawhin Brazil number 9 ni awm renga a khelhchhuah a ṭul - hemite pahnih hi an 'form' ngat chuan chu ringawt pawh chu Forest tlarhnung tan buaina tham a ni ang.

Midfield-ah Forest goal nawr tur chhu chat turin Yves Bissouma leh Ismaïla Sarr an awm ngei a rinawm a, Forest-in striker inhliam Taiwo Awoniyi tel loin Spurs tlarhnung chhut chah an tum dawn - zanin nghak phawt ang aw!