London-in Best FIFA Football Awards thleng dawn

Best FIFA Football Awards 2023 ceremony chu January 15, 2024 hian London-ah neih a ni dawn. Football hunpuiah hian chawimawina 11 semchhuah a ni dawn a, chung zinga ngaihven hlawh ber tur chu 'The Best FIFA Men’s Player' a ni ang.

London hian 2017 leh 2018 pawh khan Best FIFA Football Awards ceremony hi an thleng tawh a, England khawpuiin inelna a thlen ṭum hian Cristiano Ronaldo leh Luka Modric ten chawimawina an dawng.

Kumin February khan Paris-ah Best FIFA Football Awards 2022 ceremony neih a ni a, Lionel Messi chu khawtual player pahnih Kylian Mbappe leh Karim Benzema te aia thlan a ni.

FIFA chuan September 14, 2023 khan a dawng thei tur player 12 an tar chhuak a, la thlit fim leh tur a ni. Messi pawh dawng thei tur zingah telin Julián Álvarez, Marcelo BrozoviC, Kevin De Bruyne, ilkay Gündogan, Erling Haaland, Rodri, Khvicha Kvaratskhelia, Kylian Mbappé, Victor Osimhen, Declan Rice leh Bernardo Silva te hming a lang bawk.

FIFA hian mipa leh hmeichhe category-ah coach leh goalkeeper te pathumah an thlifim tawh. Goalkeeper pathumte chu Morocco goalkeeper Yassine Bounou, Belgium leh Real Madrid keeper Thibaut Courtois leh Manchester City keeper Ederson te an ni. Season liam taa City treble champion puitu Ederson buk a rit ang.

Coach-ah Manchester City manager Pep Guardiola bakah Inter Milan coach Simone Inzaghi leh Italy coach Luciano Spalletti te an ni. Spalletti hi thlan a nih chhan hi Serie A-a Napoli a champion pui vang a ni a, tunah chuan Italy a enkawl tawh. Inzaghi hian Inter Milan chu UCL-ah final a thlenpui a, hetah pawh hian City treble champion puitu Pep-a buk a rit hle.

The Best FIFA Football Awards-ah vote thei hi group pali coach, captain, journalist leh fans-ah te ṭhen darh a ni a, group tin hian 25% ṭheuh an chang. Finalist zingah vote inang hmu an awm a nih chuan pakhatnaa thlan tam zawk chu dah pawimawh tur a ni.