Chennai-ah goal a lut lo

Pathianni zan Indian Super League-ah South Indian derby kan hmu a, Chennaiyin FC chuan Bengaluru FC an mikhual - goal erawh hmuh tur a awm lo a, team pahnih hi 0-0 in an ṭin. 

Jawaharlal Nehru Stadium, Chennai-a inkhelah hian mualneitu club tan Laldinliana Renthlei, Jerry Lalrinzuala leh Lallianzuala Chhangte te chuan inkhel bul an ṭan vek a, minute 90 an khel tluan vek bawk. 

Bengaluru hian hnehna chang se FC Goa leh ATK hnungzuiin semifinal hmun a chiang thei ang - mahse hnehna an chan zawh tak lohah chuan match khat dang an nghah leh phawt a ngai dawn tihna a ni. 

Hetihlai hian Chennai club tan top four-a awm chance a awm zel dawn tihna a ni a, Mumbai City leh Odisha FC te tan pawh beisei a la bo lo. 

Nizan khan NorthEast United leh Jamshedpur FC inkhelin result kan hre hman lo a, zaninah erawh inkhel a awm dawn lo thung.