Tlai boruak nuam tak hnuaiah I League inkhel hmuhnawm

I League-ah Mizo club Aizawl FC an che ṭha a, table-ah pahnihnaah an awm mek. Mizo coach B. Malsawmzuala kaihhruai Aizawl FC hian vawiin tlai dar 3:00 hian RG Stadium, Mualpuiah team ṭha Gokulam Kerala an mikhual dawn a, hnehna an chang a nih chuan pahnihnaah an inhlangkai dawn.

Mizo club-in Mizo mipui ṭawiawmna an mamawh a, tualchhung football hmangaihtute penchhuah a hun e.

Ṭawiawm phu Aizawl FC

Aizawl FC-in Dutch coach Erol Akbay hoin bul an ṭan a, Mohammedan SC 2-1 in an hneh lo. Hemi hnu hian Akbay hi a bang a, Mizo coach Sawmtea'n hming chher nan a hmang ta thung. Sawmtea hnuaiah Aizawl FC-in khualmualah team ṭha Sreenidi Deccan (2-1) leh Neroca (3-1) te an hneh a, an phur hle. Mahse, RG Stadium-a an match hmasa berah Delhi FC 5-1 ngawtin an hneh lo.

Aizawl FC an tlusawp a, mahse an tlu rei lo. Sawmtea hoin an mualphona hmun RG Stadium-ah ngei Namdhari 3-0 a sawpin an tho. I League leh MPL an khel kawp chungin result ṭhain a chhunzawm a; khualmuala match li an khelh aṭangin point riat an hmu. Manipur club Trau 5-1 a an sawp bakah hneh loh la tawng lo Shillong Lajong chu an mualah ngei 3-0 in an sawp leh bawk. Mizote tihmingṭhatu Mizo tlangvalte hian ṭawiawm an phu hle a ni.

Football Entlak

Erol Akbay-a'n match khat lek Aizawl FC a enkawl khan mual lai aṭanga nawr turin a naute a hrilh a, an hlawhchham. Sawmtea'n thuneina a chan hnuah mual sir aṭangin an nawr tel a, R. Lalthanmawia leh R. Ramdinthara te an nung sawt.

Hma tawng bera awm Serchhip tlangval Lalrinzuala'n match kuaah goal kua a khung a, top scorer beiseina a nei pha hial. I League-ah hian foreigner ṭha an ṭhathnem ṭhin avangin top scorer nih hi a har a; league vawi 15 neih tawhah Sunil Chhetri leh Bidyashagar Singh te chauh an la ni thei.

Rinzuala elpui tur zinga mi chu zanina Gokulam tana jersey no. 38 rawn ha tur Alejandro Sanchez Lopez hi a ni.

Kum 34 mi Spanish forward Sanchez hian goal kua tho a khung a, La Liga thlenga khel tawh player hi a thlawp turin La Liga-a khel tawh tho Edu Bedia a awm. Bedia hi Gokulam a pan hmain FC Goa tan ISL-ah hming a chher tawh a, an player neih dan thlirin an budget a sang tih a hriat theih.

Chutihrualin Gokulam hian match nga chhung chak hmel an hmu tawh lo a, Mizo club hi Mizo mipui an ṭawiawm ṭhat chuan point thum hmuh beiseina a awm. Aizawl FC-in Sawmtea hnuaiah football hmuhnawm an lantir ṭhin a, Gokulam lakah fiahin an awm ang.

Aizawl FC thuneituten mipui harsatna hriain inkhel en man Rs 200 ni ṭhin chu Rs 100-ah an tihniam. AFC leh Gokulam inkhel tur hi ruahman dan chuan zana inkhel tura tih a ni a, generator chhiat vangin floodlight pali zinga pakhat a êng thei lo a, nimin thlenga an siam ṭhat hman loh avangin tlaiah sawn a nih phah ta a ni.