Liverpool-in Ten Hag an ban dawn em?

Manchester United-in beiseina sang tak nena an lakluh, coach ropui Jose Mourinho kha Liverpool laka 3-1 a an tlawm hnu lawkah an ban a, amah thlaktu Ole Gunnar Solskjaer lah Liverpool laka 5-0 ngawta an tlawm hnuah league match thum bak an inhrawn zui lo - a chhuahna tur kawng an hawnsak zui.

Solskjaer thlaktu Ralf Rangnick kha coach lailawk a ni a, Liverpool lakah United chu 4-0 in a tlawmpui hman tho! German coach hian, "Liverpool kan phak lohna hi kum ruk vel a ni hial ang," a ti zui a, United ṭantu ruhkawl tan lem a harsa hle - an inla nghet lo chiang!

Pathianni zan dar 10:00-ah team talbuai United hian league-ah Liverpool khelmual an lenchilh dawn a, an coach Erik ten Hag chu ban theih dinhmunah a ding mek - Reds lakah an tlawm a nih ngat chuan Dutch coach hi a puanthuah tel tura inpeih a mamawh ang.

Khaikhinna

Jurgen Klopp-a'n tun season-a Liverpool insiamṭhatna chu, "Liverpool 2.0" tiin a sawi a, an insiamṭha tak tak - league match 16 an khelh tawhah vawi khat chiah la tlawmin, table chung ber an luah mek a, United nena an inkarah team pali an awm.

United hi table-ah parukna an ni mek a, Reds an phak lohna hi point 10 a tling tawh. Hei chauh a ni lo, Champions League group stage-ah table mawngphah luahin, European football an mangṭha a, Bayern Munich an phak lo hi dem lo pawh ni ila, Copenhagen leh Galatasaray an phak lo hi chu dem tur an ni.

Hetihrual hian zanina an hmachhawn tur Liverpool hi chak lo hlim ve tho an ni a, Europa League-ah Union Saint-Gilloise chu 2-1 in an ngam lo. Mahse, Reds hian last 16 an lut chiang tawh a, naupang rual an chhawr avangin United tan ngaihṭhat phahna tur a ni lo.

A la tawp lo

Ten Hag-a'n United boss a nih tirha a thusawi lar tak chu Premier League coach ṭha pahnih Pep Guardiola leh Jurgen Klopp-a te hun a tihtawp theih thu a ni a, "An hun pawh a herliam ve thei," a ti a, a thusawi hi a lar hle.

Mahse, kum 2023 krismas kan hnaih meuh chuan Klopp leh Pep te vung takin an la kal a, Old Trafford-a Ten Hag-a dinhmun erawh a nghing ta thung. "Theatre of Dreams" tih meuha hming lem an phuah Old Trafford pawh mangchhe neihna hmun mai a ni ta a, thawnthu ngaihnawm an ziak thei meuh lo.

United hian an league match hnuhnung berah club tenau Bournemouth chu 3-0 ngawtin mahni mualah an ngam lo a, a mualpho thlak hle - Anfield-a chak tura beisei san a harsa.

Salah vs Hojlund

Liverpool tan season dang ang bawkin Mohamed Salah chu player langsar a ni a, Egyptian forward hian tun season-ah Liverpool tan league-ah goal 11 khungin, assist vawi sarih a nei leh der tawh a, United tlarhnung tan lu tihaitu a tling leh dawn.

Hetihlai hian United-in an lakluh tirha thawm nei lian tak Hojlund-a'n league-ah match 12 a khel tawh chungin goal a la khung lo a, Sheffield United forward William Osula nen centre-forward zinga league match nga aia tam bul ṭan tawh chunga goal la khung lo awmchhun an ni!

Reds tan tlarhnungah Virgil van Dijk leh Ibrahima Konate te an ding leh ang a, Hojlund tan a record duhawm lo thai chhiat a harsa dawn - season hmasaa 7-0 ngawta an tlawmna khelmualah United hi eng tak ang dawn maw? Hriattir kan ni thuai dawn e.