Lionel Messi kawr man a tam

Argentina captain Lionel Messi-a'n Qater World Cup an champion ṭuma a jersey hak ho chu lilam a ni a, a jersey parukte chu Sotheby chuan New York khawpuiah lilamin pound maktaduai 6.1-in an hralh.

Captain Messi hoin Argentina hian France an hneh a, a vawi thum nan world champion an ni. A jersey an lilam te hi - final first half chhunga a hak, semifinal, quarterfinal, last 16 leh group match pahniha a hakte an ni hlawm.

Football player-te jersey an hak hlui an lilamna aṭanga an hralh to ber chu Diego Maradona jersey hlui kha a ni. England an hneh ṭuma 'Hand of God' a neihna jersey ngei mai kha kum 2022 khan pound maktaduai 7.1-in an hralh a ni.

Ballon d'Or vawi riat dawng tawh Messi hian World Cup 2022 match kha a khel kim vek a, player dang tumahin an la tih ve theih ngai loh - group stage, last 16, quarterfinal, semifinal leh final-ah goal a khung kim vek.

Messi hi January 15, 2024-a neih tur Best FIFA Football Awards 2023 ceremony-ah 'The Best FIFA Men’s Player' dawng turin a dinhmun a ṭha viau bawk. Player 12 aṭangin hming pathum thlitfim zingah Argentina captain Messi hi a tel a, Kylian Mbappe leh Erling Haaland te an awm bawk.

Kumin February khan Paris-ah Best FIFA Football Awards 2022 ceremony neih a ni a, Lionel Messi hnenah The Best FIFA Men’s Player hlan a ni a, nakkuma London-a chawimawina sem hunah pawh chawimawina dawng tura rinkai ber a ni leh bawk.