Aizawl FC tan hmun a awm lo

Zote Toyota MPL10-ah Aizawl FC tan semifinal-ah hmun a awm lo. AFC hian I League nena an inelna an khel kawp chu chhuanlam atan hmang thei bawk mah se I League awm hma phase 1-ah khan palina an ni pha chauh.

Aizawl FC hian phase 1-ah point 11 an hmu a, phase 2-ah pawh point 11 tho hmu lehin a belhkhawmin point 22 an hmu. Phase 2-ah hian Chhinga Veng an rawn insiamṭha a, point 16 ngawt an rawn hmuh avangin Lalsangzuala Hmar hote hian I League club hi an rawn lehthal a ni.

AFC tan MPL-a semifinal awm hnua knockout stage an thlen phak lohna hmasa ber a ni a, pangana niin season an khar. MPL1 leh MPL2-ah khan semifinal a la awm lo a, inelna hmasa pahnihah khan pangana ve ve an ni.

Chutihrualin AFC hi MPL3, MPL4, MPL8 leh MPL9-ah te khan league round-ah pakhatna an ni thung. MPL-ah Aizawl FC hi champion ngun ber an ni a, vawi li an champion tawh a ni.