MPL10 top scorer tur Rinzuala nge Dawngtea?

Zote Toyota MPL10-ah Aizawl FC forward Lalrinzuala'n goal riat khungin top scorer a ni mek a, amaherawhchu I League hian semifinal an khelh dawn loh avangin Serchhip tlangval hian goal a khung belh dawn tawh lo.

Rinzuala hnaih bertu chu Electric Veng captain C. Lalhriatpuia leh Chhinga Veng captain MS Dawngliana te an ni a, goal sarih ve ve an khung. C. Hriata'n semifinal a khel dawn lo a, Rinzuala elpui ber chu Dawngtea a ni.

Chhinga Vengin semifinal-ah Mizoram Police an hmachhawn dawn a, Dawngtea tan goal khung belhna remchang a la awm. Chutihrualin Rinzuala hian match a khelh tlem avangin Dawngtea tan goal hnih tal khung a ngai dawn.

Bawngkawn forward Dawngtea hian match hmasa parukah goal a khung lo a, round 7-ah goal khatna a khung chauh. Mahse, Electric Veng laka goal li ngawt a khung avangin a rawn invawrh chho a, a tawnhriat ṭha tak avangin Rinzuala hi a rawn khum a nih pawhn a mak lo ang.

Dawngtea hi MPL1 top scorer a ni a, MPL2 leh MPL7-ah best forward ni bawkin MPL10-ah a record ṭha sa a ṭha zawnga belhchhah theihna hun a nei leh bawk.