Goal 158 a lut tawh!

Zote Toyota MPL10-ah match 56 khelh a ni tawh a, goal 158 a lut tawh. Match tina goal 2.82 lut ang a ni. Round khata goal lut tam ber ṭum chu round 7 kha a ni a, goal 17 tehmeuh a lut.

Chutihrualin thla hnih dawn MPL chawlh a nih hnuah MPL khelh chhunzawm a ni a, round 8-ah khan goal thum chauh a lut. Mahni lama goal khung (own goal) vawi sarih a awm tawh a, goal 151 dang hi player 83 khung a ni.

MPL table aṭanga thlir chuan Mizoram Police-in goal an khung tam ber a, goal 27 an khung. Mahse, hetah hian Chhinga Veng laka 3-0 a chaka an puana goal thum a tel. Goal khung pangngai chauh chhiar chuan Police hian goal 24 an khung a, Aizawl FC nen an khung zat a inang.