Gerard Houllier a thi

Liverpool manager hlui Gerard Houllier chu nimin tlai khan kum 73 mi niin a thi a, French infiamna chanchinbu lar L’Equipe-in a tarlan dan chuan Paris khawpuia a lung zai a nih hnuah Houllier hi a thi. 

Houllier hian 1998-2004 inkar khan Liverpool hi a enkawl a, nomawi lian tham panga a chawipui - League Cup (2), FA Cup (1), UEFA Cup (1) leh UEFA Super Cup (1)-ah te champion nomawi a chawi  a ni. 

Liverpool-a hun a hman laia hriat a hlawhna ber chu 2000-01 season kha niin cup treble champion a nihpui a, FA Cup, League Cup leh UEFA Cup-ah te an champion - Reds a pan hma hian Lens, Paris St-Germain leh France national team a enkawl a, PSG-ah hian Division 1 (Ligue 1) nomawi a chawi hman. 

Merseyside club-a chhuahsan hnuah French club ṭha Lyon-a enkawl zui a, Ligue 1 (2) leh French Super Cup (2)-ah te nomawi a chawipui leh thei a ni. 

Lyon-ah season hnih a hlawhtlin hnuin 2007-ah a contract tihtawp a dil a, Houllier hian chawlh hahdam a mamawh thu a sawi - a chawlh hnuah kum 2010 khan Aston Villa-a enkawl leh a, mahse thla kua hnuah lung lam ṭha lo avangin a chawl. 

Liverpool chuan, "Treble nomawi min chawipuitu coach kan thlah ta hi hrehawm kan ti takzet a, Liverpool Football Club chuan Gerard-a chhung leh ṭhiante a hre reng a ni," an ti. 

Aston Villa chuan, "2010/11 season-a kan manager liam thu kan hriat hian min ṭhawng hle. He hun harsaah hian Gerard-a chhungte kan hre reng a ni," tiin French manager an thlah ve bawk.