A chung berah West Ham leh Brighton

Europa League group stage khelh zawh a ni - Premier League club West Ham United leh Brighton te chu an awmna group ve veah a chung ber luahtu an ni a, playoff khelh ngai loin last 16 an inhlangkai.

Moyes leh a naute

Group A match hnuhnung ber khelh hmain West Ham an tling chiang tawh a, anmahni hnaih bertu leh pakhatna dinhmun chuh thei chu Freiburg an ni. Team pahnih an intawng ta ngei a, mualneitu Hammers lamin Mohammed Kudus leh Edson Alvarez te hmangin 2-0 in hnehna an chang.

Group hmahruaitu ni chunga tlang hi thil lawmawm a ni, playoff khelh ngai ta se la chuan Champions League lam aṭanga tla AC Milan, Galatasaray, Benfica leh Shakhtar Donetsk te chu an hmachhawn theih zinga mi an ni, tunah chuan an pumpelh rih ta phawt.

Hammers manager David Moyes chuan, "Inkhelh hmabak kan ngah em em a, chutiang karah playoff khelh ngai lo tura kan tlang thei hi player leh coaching staff tan thil ṭha tak a ni. Krismas boruak leh match hautak a innang chhunzawm leh dawn a ni," a ti.

Inhnehtawk pawh ni se West Ham kha group hmahruaitu ni thei tur an ni. October thla khan Freiburg khelmualah Moyes leh a naute hi 2-1 in an lo chak tawh, chutihrualin goal hnih china tlawm ni se la chuan pahnihnaah an la hniam ve thei bawk - an mamawh ang takin point thum an hmu.

Brighton an sang

Inkhel dangah Brighton chuan Group B lama hmahruaitu Marseille an mikhual a, chak ngei a pawimawhna inkhelah Ligue 1 club hi 1-0 in an lo hneh, goal awmchhun hi hun tawp dawna Joao Pedro khung a ni.

Roberto De Zerbi enkawl Marseille tan goal khung loa inhnehtawk mai kha a him a, hmahruaitu an nih theihna kawng pawh a ni. Mahse, hun tawp hma deuhin Pedro a inlar ta si a, team pahnih dinhmun a inthlakthleng ta hlawk.

Goal pawimawh khungtu Pedro chuan, "Ka hlim takzet, football ka khelh hun chhunga ka hun tawn hlim ber ṭum a ni. Keimah chauh ka ni lo, ka ṭhiante min puih vangin Europa League goal khung hnem ber pawh ka ni mek," a ti.

Brazilian forward Pedro hian goal ruk a khung tawh a, ani aia khung tam an awm lo - amah hnaih bertu Marseille striker Pierre-Emerick Aubameyang chuan goal nga a khung tawh thung a, an inthlauhna hi goal khat chauh a nih avangin an inhlat lo hle.