Xavi dinhmun a derthawng?

La Liga leh Champions League-a an match hnuhnung berah Barcelona an tlawm ve ve a, La Liga-ah hmahruaitu Girona chu 4-2 a ngam loin, Champions League-ah Royal Antwerp chu 3-2 in an ngam lo bawk - zanin dar 1:30-ah league match khel turin Valencia an lenchilh dawn.

Barcelona-in Antwerp an hmachhawn hmain Champions League-ah round of 16 an lut fel tawh a, an tan result awmze nei tawh lo a ni. Hei vang hian Xavi pawhin squad a siksawi a, mahse, Belgian club laka an tlawm hi fan-ten an la na hle.

Hetiang boruak karah hian Barcelona khawpuia infiamna chanchinbu lar Mundo Deportivo chuan, "Ngaihdamna a awm thei lo," tiin Barca tlawm an hriatthiam loh thu an ziak a, Sport phei chuan, "A tawk zozai ta," tih an hmang!

Season hmasa lawkah Xavi-a'n budget tlem tak chungin La Liga-ah Barca a champion pui a, tun season-ah erawh beisei an phak lo - league match 16 khelh tawhah palina an ni a, point sarihin hmahruaitu Girona an phak lo mek.

Girona nena an inkar sawr zimna remchang an neihah 4-2 in an tlawm zui. Xavi chuan, "Girona laka kan tlawmna khan min ti na hle," a ti a, Valencia nena an inkhel tur chu, "Final a ni e," tiin a sawi bawk.

Antwerp laka an tlawm khan Robert Lewandowski leh Ilkay Gundogan a chhawr tel avanga sawisel hlawh zual a ni a, player pahnih chu sports director Deco leh club official dang hriatpuinaa chhawr a nih thu a insawi laiin, Deco-a'n a hriatpui loh thu a sawi thung!

A tawi zawnga sawi chuan Xavi dinhmun a derthawng a, Spanish coach hian a hna leh a hmingṭhatna humhim turin zaninah chak a mamawh - Valencia hi an league macth hnuhnung paliah an chak zo tawh lo bawk.