Dortmund-in Sancho dawr lo

Borussia Dortmund chuan Manchester United-a tla tlum lo mek, an player hlui Jadon Sancho la let tur anga sawi thawm awm chu an pha a, Dortmund director Sebastian Kehl chuan indawrna engmah a awm loh thu a sawi.

Manchester United chuan January-ah Dortmund forward Donyell Malen lakluh an tum dawn nia sawi a ni a, German club hian Sancho laklet theih nana hman remchan an tum niin khawthlang media-te chuan an tarlang.

Mahse, Dortmund director Kehl chuan, "Tun dinhmunah chuan player inthleng chungchangah tu mah indawrna kan neihpui lo a, mi player va thlithlai pawh kan nei lo," a ti a, January-a Old Trafford chhuahsan tur anga sawi Sancho an ngaihven loh thu a sawi.

Dortmund hi league table-ah pangana niin match 14-ah point 25 an nei tawh a, hmahruaitu Bayer Leverkusen chu point 11-in an phak lo mek - zanin dar 8:00-ah Augsburg an lenchilh dawn a, Edin Terzic-a naute hian champion an tum chuan tlawm a thiang tawh lo.