Sevilla-in Man United nomawi beiseina titawp

Manchester United-in Europa League semifinal-ah goal khung hmasa mah se Sevilla-in 2-1 in an lehthal. Julen Lopetegui hoten final-ah nizana Inter Milan leh Shakhtar Donetsk inkhela chak zawk an hmachhawn dawn.

RheinEnergieStadion, Cologne-ah Bruno Fernandes-a'n minute 9-na lekah penalty hmangin Man United tan goal a khung a, Sevilla-in Liverpool midfielder hlui Suso leh Luuk de Jong te hmangin an chhanglet.

Manchester United manager Ole Gunnar Solskjaer-a'n Sevilla hmachhawn turin quarterfinal-a inlan keeper Sergio Romero leh defender Eric Bailly te aiah David de Gea leh Victor Lindelof te luhtir mah se an inrem dan erawh a ngai.

Tlarhmaah Anthony Martial a mal tlat a, French forward hi Bruno Fernandes, Marcus Rashford leh Mason Greenwood ten an thlawp. Tlarhma leh tlarhnung thlun zawm turin midfield-ah Paul Pogba leh Fred an ding a, Brazilian midfieder hi Nemanja Matic aiin match zawna thlan a ni.

Tlarhnungah captain Harry Maguire leh Lindelof te inkawpin mual sirah Aaron Wan-Bissaka leh Brandon Williams te an awm. Man United-in final lut turin beisei a nei sang a, an khelh dan hmangah erawh thil thar beisei tur a awm lo.

Manchester United-in bul an ṭan ṭha a, Marcus Rashford chuan ball a petchhuah hnuah Sevilla defender Diego Carlos-a'n a tlawh. Referee-in penalty a pe a, Bruno Fernandes-a'n chiang zetin tun season-a United penalty vawi 22-na a khung.

Solskjaer-a nauten bul an ṭan fuh a, an vanneihna erawh penalty an hmu leh ṭhin hi a ni. Quartefinal-ah pawh Copenhangen lakah penalty hmangin chakna goal leh goal awmchhun an khung a, goal dang an khung lo.

Sevilla nen hian United khel chhe hran lo mah se Spanish club hian ṭum danga an tih ṭhin angin ball an chang tam zawk. Minute 26-naah Sevilla-in Lucas Ocampos hmangin mual vei lam aṭangin United tlarhnung an ṭhiat a, Maguire leh Williams ten an ven tur an insem ṭhat loh bawk avangin vengtu nei lo Suso-a'n chiang zetin a pet goal.

Second half ṭantirah Man United-in chance ṭha pali an nei nghal a, first half ang thoin Martial leh a kawppuiten goal an keng tel lo. Rawlthar duhawm Mason Greenwood-a goal khung tur chu keeper Yassine Bounou-a'n (Bono) a dansak.

French forward Martial-a'n goal-ah pet mah se keeper Bono bawkin a dang. Hemi per hi Rashford-a'n goal-ah a pet nghal a, Sevilla player-in an dang hman. Martial hian keeper chauh a hmachhawn zui a, amaherawhchu keeper Bono bawk a dingchang. United tlarhma a bil!

Sevilla hian Europa League quarterfinal an thlen tawh chuan an champion ziah. Spanish club hi Europa League-ah vawi nga an champion tawh a, United nen pawh an talbuai lo. Midfielder Ever Banega ten an tih tur chin an hria a, ṭum dang ang thoin ball an chang tam zawk.

Solskjaer-a'n substitution a siam ngam loh laiin Julen Lopetegui erawhin Ocampos leh Youssef En-Nesyri te aiah Munir El-Haddadi leh Luuk de Jong te a luhtir a, subsititute awmze nei tihin a sawi theih.

El-Haddadi-a'n United tlar-hnung tan harsatna a siam a, De Jong-a'n chakna goal a khung. Dinglam aṭangin captain Jesus Navas-a'n cross ball ṭha bik a vawrhlut a, Lindelof leh Wan-Bissaka te ven loh De Jong-a'n awlsam takin a pet goal.

Tlai hnuhnawhah United-in Daniel James, Juan Mata, Odion Ighalo leh Timothy Fosu-Mensah te luhtir mah se danglamna an thlen pha tawh lo. Sevilla-in a vawi ruk nan Europa League final an lut a, an khingpuite aia ni khata an chawlh tam avangin vawi ruk champion theihna hun ṭha tak an nei a ni.

Sevilla coach Julen Lopetegui chuan, "Manchester United hi lockdown hnua England-a team ṭha ber an ni a, hmabak êng tak an nei a ni. United ang hi kan tawng meuh lo, first half-ah inkhel thunun mah ila second ṭantirhah erawh kan thei lo - keeper Bono-a'n min chhan. Goal kan chhuah belh loh avangin chak theihna turin hun ṭha kan neih chauh zawk a ni," tiin a inngaitlawm hle.

Spain leh Real Madrid manger hlui Lopetegui chuan, "Ka naute leh min ṭantute ka lawmpui takzet, tunah chuan kan duh kan hmu a, kan hahdam rih thei ang. Final kan thlen tak chuan nomawi chawi ngei kan duh," tiin a sawi a, Sevilla-in Europa League final vawi nga an luh tawha nomawi an chawi vek avangin inrintawkna an ngah sawt ang.