Chelsea chakna Cole Palmer

Cole Palmer-a goal leh assist hmangin Chelsea chuan Sheffield United 2-0 in an hneh a, hnehna an chan hnuah Blues coach Mauricio Pochettino chuan Palmer chu an team khai nungtu a nih thu a sawi.

Inrinni zan Premier League inkhelah Chelsea tan Palmer hian second half tir lamah Raheem Sterling-a siamsak a khung a, a hnuah Nicolas Jackson tan siamsak ve thungin an chakna hnar a ni a, inkhelh bana fak a hlawh pawh hi a mak lo.

Nipui bazar lai khan kum 21 mi Palmer hian Manchester City aṭangin Chelsea a zawm. London club tan hian inelna hrang hrangah match 19 a khelh aṭangin goal 13-ah a inrawlh tawh, a club thar tan tha a thawhhlawk hle.

Palmer a fak

Chelsea hian player ṭha tam tak an kawl a, inkhel thununin khel ṭha pangngai mah se goal khung an harsat ṭhin. BBC tarlan dan chuan Sheffield United lakah pawh hian ball possession 80% lai an nei, mahse an tlarhma hriam tawk lo chu an tawrh leh mai rinna pawh a lian hman.

Amaherawhchu, hun pawimawhah Palmer-a'n awmna tur hmun a thlang dik a, defender ten Jackson an ven karah rawn dawk chhuakin goal a khung. An goal hnihna pawh line bul lawk aṭanga ṭha taka a siamsak hram vang a ni.

Chelsea manager Mauricio Pochettino chuan, "Ka tan chuan inkhel khaikhawmtu leh game siamtu a ni, team pumpui kha a khaikhawm thei tlat. Goal a khung theih piah lamah a ṭhiante tan a siamsak thei bawk a, kan hnena a lo kal aṭanga Cole Palmer hnathawh hi a ropui hle," a ti.

Blues hian Thawhlehni zanah League Cup quarterfinal khel turin Newcastle United an mikhual dawn a, kumin chhungin EPL-ah Wolves, Crystal Palace leh Luton Town te an la hmachhawn dawn bawk, chawl hman an ni dawn lo.

Inkhel dang

Tun hnaiah Everton inkhel a hmuhnawm, point 10 an paihsak hnuah an khel ṭha sawt emaw ni tih mai tur a ni. Sean Dyche-a naute hian Amadou Onana leh Michael Keane te goal hmangin Burnley 2-0 in an hneh a, point 16 neiin tunah chuan an tlak a hlauhawm loh.

Newcastle United pawh Champions League lamah beisei phak lo mah se an tho chhuak leh nghal a, an mikhual Fulham chu 3-0 in an sawp. Magpies goal pathum hi Lewis Miley, Miguel Almiron leh Dan Burn te khung a ni.

Mikhual Fulham striker Raul Jimenez chu Sean Longstaff laka a chet dan hlauhawm tak avangin minute 22-na lekah hnawhchhuah a ni a, player kim lo an nih hnuah goal thum an chhuah a, mikhual an nih bawk avangin an tan thawhchhuah a harsa.

Zirtawpni zana inlan Tottenham Hotspur pawhin harsatna lian tham an tawk lo. Spurs hian Nottingham Forest chu si hnih faia an hneh theih avangin table-ah pawh pangana dinhmun an luah a, a sang zual pali zinga tel phak an la tum ngam zel.