Inkhelh laiin Lockyer a tlu

Luton Town captain Tom Lockyer chu Bournemouth nen Inrinni zan Premier League match an khelh laiin a tlu a, a tluk hun hi minute 65-na niin team pahnihte 1-1 in an inhnehtawk mek - inkhel chhunzawm loa tihtawp lailawk a ni.

Kum 29 mi Lockyer hi lungphu chawl vanga tlu a ni a, khelmualah enkawl hmasak a nih hnuin damdawi inah an hruai. Damdawi lam thiamten an enkawl hnuah a dinhmun a ṭha rih niin an sawi - a awm zel dan tur erawh hriat a la ni lo.

Luton chuan thuchhuah siamin, "Kan medical team chuan Hatters captain Tom Lockye hi khelmual chhungah a lungphu a chawl ngei tih an finfiah. Kan team chauh ni loin Bournemouth lam medical team pawhin theihtawp min chhuahpui, an chungah kan lawm takzet.

"Theihtawpin stadium-ah khan enkawl nghal a ni a, chumi hnuin damdawi inah hruai a ni. A kiangah a chhungte an awm reng a, a hriselna dinhmun endik chhunzawm a ni ang," an ti.

Kumin May thla khan Lockyer hian Coventry an hmachhawn ṭumin harsatna hi a lo tawk tawh a, hemi ṭum pawh hian damdawi inah hruai a ngai hial a, zai niin June thlaah a inkhel leh thei mai - tunah hian engtiang takin nge a awm dawn erawh hriat a la ni lo.

Nimin tlai thleng kha chuan Luton leh Bournemouth inkhel hi engtianga tih chhunzawm tur nge sawi a la awm lo a ni.