Aizawl FC leh Gokulam an inhnehtawk

18th December, 2023

I League-ah Aizawl FC-in khualmualah a zawnin match hnih hnehna an chang a, Inrinni tlai khan Gokulam Kerala lakah a zawna vawi thum chak theihna remchang nei mah se 1-1 in an inhnehtawk. RG Stadium-a inkhelah Mizo club tana Lalbiakdika goal khung chu Kerala club-in Alex Sanchez hmangin an sut.

Team pahnihin fimkhur takin bul an ṭan a, goal chance a awm meuh lo. Minute 31-naah Lalrinfela'n (Mafela) dinglam kilah Muhammed Saheef chiang takin a bum a, a ball pass chu Champhai Zotlang tlangval BD-a'n ṭha zetin a khung.

Minute 42-naah captain Lalchhawnkima a inhliam a, mak tak maia Aizawl FC-in squad-ah Lalmuanawma (Munez) an dah loh avangin Brazilian defender Gustavo a rawn lut. Gustavo hi match hnuhnung paliah squad-ah a awm tawh lo a, Namdhari an hneh ṭuma a inhliam avangin a zin lo a, match fitness a nei lo. Mizo club tlarhnung a nghing zui.

Injury time-ah Aizawl FC an talbuai zual. Gokulam left back Saheef-a'n chiang zetin BD-a a bum a, a cross ball chu captain Alex Sanchez-a'n a tauh lut. Spanish forward hian a tauh ṭha a, defender Laldanmawia'n a hna a thawk tawk lo.

Gokulam-in second half-ah an ṭhat zawkna an pholang. Kerala club hian Spanish player pathum Alex Sanchez, Edu Bedia leh Nili bakah Cameroonian defender Aminou Bouba te bul an ṭantir thei a, bench aṭangin Tajik forward Komron Tursunov an luhtir a, an squad chhah ṭhatzia a lang.

Alex-a'n Gustavo a paltlang hnuah keeper Nora Fernandez tan hna a siam a, Spanish midfielder hian box pawn chiah aṭangin freekick a pet a, goal-ah a chantir thei lo thung. Aizawl FC pawhin chance an nei a, Amawia cross chu Rinzuala'n khawih pha lo chiahin BD-a'n goal zawnah a pet thei lo bawk.

Hun tawpah Gokulam goal bawh a na a, Aizawl FC an ṭang tluan thung. Mizo club hi match ruk chhung chak loh nei loin an kal tluang tawh a; December 21, Ningani zanah Inter Kashi an mikhual ang. Kerala club erawh match nga chhung chak hmel an hmu tawh lo thung.

Inkhelh banah AFC coach B. Malsawmzuala chuan, "Ka enkawl hnua kan khelh chhiat ber ṭum a ni. Player-ten rilru an pe tawk lo. Krismas leh kumthar chawlh nuam taka kan hman theih nan Inter Kashi lakah chak ngei a ngai," tiin Vanglaini a hrilh.