Man City an chak zo lo

Premier League champion lai Manchester City tan meuh pawh tun season chu a awlsam lo - Pep Guardiola naute hian Crystal Palace lakah goal hnih ngawtin hma hruai hmasa mah se, mikhual lamin an sut zawh avangin a tawpah 2-2 in an inhnehtawk.

Etihad Stadium-a inkhelah Citizens tan Jack Grealish leh Rico Lewis ten goal an khung a, striker ṭha Erling Haaland awm lo mah se goal khungah harsatna an nei lo a, engzat tak khung belh leh ang maw, tih chu zawhna a ni.

Mahse, team ṭha barakhaih fo tawhtu Palace an ṭang thei tlat - hun tawp hma minute 14 chauh awm tawhah Jean-Philippe Mateta hmangin an sut ṭhen a, hamrik hnuhnung rik hma chiahin Mateta hian penalty a hlawh chhuak zui.

Foden-a'n Mateta laka a chet danah tihsual nei loah a inngai a, mahse referee Paul Tierney-a'n penalty a kawk miau si. A pet tura rawn ding chhuak Michael Olise chuan goalkeeper Ederson tan dan theih loha khungin point an hlawh chhuak.

Man City manager Guardiola chuan, "Vanduai vang a ni thei lo, hei chu kan phu ang tawk result a ni. Goal dang khung belh thei ni ila chuan inkhel result kha a chiang nghal mai ang, mahse chutiang chu kan ti thei tlat lo.

"Chutihrualin penalty kan chawi dan erawh a nem deuh mah mah, thil thlengah khan hremna tawk tur khawpin kan chesual lo," a ti. City hian point an hloh leh tak avangin palinaah an awm, nomawi humhim a hautak chho dawn.

Club World Cup semifinal khel turin an fehchhuah nghal a ngai dawn. Thawhlehni zan dar 11:30 hian Japanese club Urawa Red Diamonds nen Prince Abdullah Al Faisal Stadium, Saudi Arabia-ah an inkhel ang.

Pep chuan, "Darkar sarih chhung thlawhtheihnaah kan thlawk dawn, hnehna chang chung ngeiin boruak nuam tak hnuaiah kal thei ila duhthusam a ni. Mahse, tunah chuan kan rilru ngui hi a rang thei ang bera kan siamṭhat a ngai," a ti.