Barcelona an chak zo lo leh tawh!

Xavi dinhmun a derthawn thu Spanish media-ten an tarlan chuai chuai laiin Barcelona boss Xavi-a'n an ka hup turin hna a thawk hleithei lo a, Valencia khelmualah Barca chu hnehna a chanpui zo lo - league match-ah 1-1 in an inhnehtawk.

Inrinni zana Valencia an lenchilh hmain Barca hi match hnih a zawnin an tlawm - league-ah hmahruaitu Girona chu 4-2 in an ngam lo a, Champions League-ah an hneh ngei tura ngaih Royal Antwerp chu 3-2 in an ngam lo zui.

Valencia lakah an insiamṭha dawn emaw kan ti a, mahse, Joao Felix-a goal hmahruai khung chu Hugo Guillamon chuan Valencia tan chhangletin, 1-1 in an inhnehtawk. Catalan club tana inhnemna awmchhun chu, "Atletico Madrid pawh an chak lo ve tho," tih chu a ni a, Atletico hi Athletic Bilbao lakah 2-0 in an tlawm.

A thlawn mai maw

Valencia-in La Liga match li zet chu a zawnin hnehna an chang zo tawh lo a, Barca tan tun hnai an result ṭha lo thaichhiatna remchang a ni. He beiseina chhi nung tur hian Felix chuan minute 55-naah goal hmahruai a khung a, Raphinha siamsak a ni.

Mahse, Barca beisei angin thil a kal vek bik lo. Minute 70-na a ni a, Valencia tan hun ṭha a her chhuak - Hugo Guillamon chuan mawi zetin si phurh sutna goal a khung a, Barca keeper Inaki Peña tan tih theih a awm lo.

Catalan club hian nawr zui mah se, Valencia goalkeeper Giorgi Mamardashvili chet ṭhat zan an tawng - Ferran Torres khung ngei tura lang ṭha zetin a dansak a, hnai set sawta Raphinha chance neih a dansak bawk. Yarek Gasiorowski chuan goal line aṭangin Raphina khung ngei tura lang a lo dang bawk a, Barca an vanduai.

Atletico an tlawm

Atletico Madrid-in Bilbao khelmualah hnehna chang se, match khata khel tlem chungin Barca an tlanpel thei ang - mahse, an beisei ang result a thleng lo a, Diego Simeone-a naute hi khualmualah 2-0 in an tlawm.

First half-ah team pahnihin goal an khung lo a, mualneitu Bilbao tan Ohian Sancet chuan penalty aṭangin hun ṭha nei mah se, a hun ṭha neih a chhawr lo.

Chawlhlawk hman a ni a, Bilbao-in chawlhlawk infuihna an hmang ṭha zawk niin a lang - Gorka Guruzeta hmangin minute 51-naah goal hmahruai an khung a, Nico Williams chuan a belhchhah bawk. Atletico-in a chhanletna tur an nei lo a, 2-0 in an tlawm.